shararat ka anjam

ek laḌkā thā ki jis kā naam thā abdul-azīz

us ko aatā hī na thā kuchh bhī salīqa aur tamīz

harkatoñ se tañg us kī sab mohalla-dār the

pyaar kartā hī na thā koī sabhī bezār the

kaam hī us ko na thā koī sharārat ke sivā

ghūmtā phirtā thā yūñhī shaam tak vo jā-ba-jā

bhaag jaatā thā kisī bachche ke muñh ko noch kar

phaaḌ detā thā kisī kā maar kar patthar se sar

chhīn letā thā kisī ke haath se paise kabhī

karne lagtā dūsre bachchoñ se vo jhagḌe kabhī

maar kar lakḌī kisī kī phaaḌ detā thā patañg

be-vaj.h ḳhud dūsroñ se kar liyā kartā thā jañg

kaam hī koī na thā us ko sharārat ke sivā

dūsroñ ko de ke iizā us ko aatā thā maza

log samjhāte the us ko chhoḌ de ye ādateñ

achchhe bachche kab kiyā karte haiñ aisī harkateñ

kab hotā nasīhat kā koī us par asar

kaan dhartā hī nahīñ thā jab vo achchhī baat par

vo kabhī ġhāfil nahīñ hotā thā apne kaam se

be-ḳhabar thā vo sharārat ke bure anjām se

ek din kī baat ik bachche ke Dhīlā maar kar

bhāgtā vo jā rahā thā jab saḌak par tez-tar

pair ke nīche koī kele kā chhilkā aa gayā

pair phislā to sharārat kī sazā vo pā gayā

chhil ga.iiñ jab kuhniyāñ aur sar se ḳhuuñ bahne lagā

haa.e allāh haa.e allāh chīḳh kar kahne lagā

tauba kartā thā ḳhudā se ḳhuub rotā thā kabhī

aur kahtā thā kisī ko ab na chheḌūñgā kabhī

ek laDka tha ki jis ka nam tha abdul-aziz

us ko aata hi na tha kuchh bhi saliqa aur tamiz

harkaton se tang us ki sab mohalla-dar the

pyar karta hi na tha koi sabhi bezar the

kaam hi us ko na tha koi shararat ke siwa

ghumta phirta tha yunhi sham tak wo ja-ba-ja

bhag jata tha kisi bachche ke munh ko noch kar

phaD deta tha kisi ka mar kar patthar se sar

chhin leta tha kisi ke hath se paise kabhi

karne lagta dusre bachchon se wo jhagDe kabhi

mar kar lakDi kisi ki phaD deta tha patang

be-wajh KHud dusron se kar liya karta tha jang

kaam hi koi na tha us ko shararat ke siwa

dusron ko de ke iza us ko aata tha maza

log samjhate the us ko chhoD de ye aadaten

achchhe bachche kab kiya karte hain aisi harkaten

kab hota nasihat ka koi us par asar

kan dharta hi nahin tha jab wo achchhi baat par

wo kabhi ghafil nahin hota tha apne kaam se

be-KHabar tha wo shararat ke bure anjam se

ek din ki baat ek bachche ke Dhila mar kar

bhagta wo ja raha tha jab saDak par tez-tar

pair ke niche koi kele ka chhilka aa gaya

pair phisla to shararat ki saza wo pa gaya

chhil gain jab kuhniyan aur sar se KHun bahne laga

hae allah hae allah chiKH kar kahne laga

tauba karta tha KHuda se KHub rota tha kabhi

aur kahta tha kisi ko ab na chheDunga kabhi