shararten

syāhī mal ke chehre par añdhere meñ dikhātā huuñ

maiñ ban kar bhuut aksar chhoTe bachchoñ ko Darātā huuñ

maiñ kab darja meñ apnī harkatoñ se baaz aatā huuñ

koī dekhe agar merī taraf to muñh chiḌhātā huuñ

rabar kī chhipkilī rakhtā huuñ bachchoñ kī kitāboñ meñ

kabhī meñDak pakaḌ kar un ke bastoñ meñ chhupātā huuñ

galī ke log bhī merī sharārat se pareshāñ haiñ

bajā kar un ke darvāze kī kunDī bhaag jaatā huuñ

kabhī abbū se piTtā huuñ kabhī aisā bhī hotā hai

gad.he kī dum pakaḌ kar khīñchne par laat khātā huuñ

ab aksar sochtā rahtā huuñ ye aadat nahīñ achchhī

ki 'sāhil' dūsre logoñ ko maiñ nāhaq satātā huuñ

syahi mal ke chehre par andhere mein dikhata hun

main ban kar bhut aksar chhoTe bachchon ko Daraata hun

main kab darja mein apni harkaton se baz aata hun

koi dekhe agar meri taraf to munh chiDhata hun

rabar ki chhipkili rakhta hun bachchon ki kitabon mein

kabhi meinDak pakaD kar un ke baston mein chhupata hun

gali ke log bhi meri shararat se pareshan hain

baja kar un ke darwaze ki kunDi bhag jata hun

kabhi abbu se piTta hun kabhi aisa bhi hota hai

gadhe ki dum pakaD kar khinchne par lat khata hun

ab aksar sochta rahta hun ye aadat nahin achchhi

ki 'sahil' dusre logon ko main nahaq satata hun