shikast-e-arzu

vo jā rahā thā

aur

maiñ ne bas ye kahā thā

suno ziyāda der mat karnā

vaqt rahte palaT aanā

us ne merī āñkhoñ meñ jhāñkte hue kahā

ham jab mileñge bahāreñ hoñgī

vaqt kuchh nahīñ bigāḌegā

aaj vo palaT aayā hai

use merī siyāh āñkheñ bahut pasand haiñ

magar siyāh halqe nahīñ

aur merī āñkhoñ kī raushnī gahre halqoñ ke bādal ne nigal chuke haiñ

māthe par fikr kī tevrī hai

tanhā.ī kī dhuup ne mere vajūd ko jhulsā diyā hai

akele-pan meñ lab kāTne kī aadat ne

guloñ se rañgat churā lī hai

vaqt kā panchhī shādmānī ko apne saath le uḌā hai

aur vo

āñkhoñ par nafīs chashma sajā.e

bahāreñ saath liye Table par mahv-e-intizār hai

maiñ us tak pahuñchte laḌkhaḌā ga.ī huuñ

aur vo khaḌā anjān nazroñ se kah rahā hai

ḳhātūn aap kī tabī.at Thiik nahīñ lagtī

kis se milnā hai kyā koī kho gayā hai

maiñ bas itnā hī kah sakī huuñ

kahā thā nā vaqt rahte palaT aanā

tum bahār ban kar khaḌe ho aur merā vaqt kho gayā

wo ja raha tha

aur

main ne bas ye kaha tha

suno ziyaada der mat karna

waqt rahte palaT aana

us ne meri aankhon mein jhankte hue kaha

hum jab milenge bahaaren hongi

waqt kuchh nahin bigaDega

aaj wo palaT aaya hai

use meri siyah aankhen bahut pasand hain

magar siyah halqe nahin

aur meri aankhon ki raushni gahre halqon ke baadal ne nigal chuke hain

mathe par fikr ki tewri hai

tanhai ki dhup ne mere wajud ko jhulsa diya hai

akele-pan mein lab kaTne ki aadat ne

gulon se rangat chura li hai

waqt ka panchhi shadmani ko apne sath le uDa hai

aur wo

aankhon par nafis chashma sajae

bahaaren sath liye Table par mahw-e-intizar hai

main us tak pahunchte laDkhaDa gai hun

aur wo khaDa anjaan nazron se kah raha hai

KHatun aap ki tabiat Thik nahin lagti

kis se milna hai kya koi kho gaya hai

main bas itna hi kah saki hun

kaha tha na waqt rahte palaT aana

tum bahaar ban kar khaDe ho aur mera waqt kho gaya