shikast-e-wafa

aadmī kis kā e.atibār kare

jab mohabbat hī ko davām nahīñ

vo mohabbat bhī kyā mohabbat hai

chaar din bhī jise qayām nahīñ

kashmakash-hā-e-zindagānī se

rishta ulfat kā TuuT jaatā hai

chand lamhoñ kī bad-gumānī se

saath barsoñ kā chhūT jaatā hai

zūd-ranj aadmī kī fitrat hai

aur matlab-parast ahl-e-jahāñ

vāqi.āt-e-jahāñ meñ sang-ba-dast

aur dil kārgāh-e-shīshagarāñ

kyā ta.ajjub hai phir agar is ne

kar diyā mahv ahl-e-ulfat ko

ye vafā kā mirī sila baḳhshā

bhuul baiThe mirī mohabbat ko

zindagī bhar nibāh ke va.ade

umr bhar kī vafā ke qaul-o-qarār

aah nā-pā.edār the kitne

jaise zulmat meñ hoñ numūd-e-sharār

phir bhī us kī taraf se ai hamdam

mere dil meñ koī ġhubār nahīñ

jāntā huuñ ki ek hālat par

gardish-e-charḳh ko qarār nahīñ

kar chukā huuñ muaaf use dil se

phir bhī ik pech-o-tāb hai mujh ko

dil ko samjhā chukā huuñ maiñ lekin

zindagānī azaab hai mujh ko

apnī ḳhuddāri-e-vafā kī qasam

nahīñ ronā ġham-e-judā.ī kā

us kī ma.asūmī-e-adā kī qasam

nahīñ ġham us kī bevafā.ī kā

haañ magar is jahāñ se huuñ bezār

jis meñ mehr-o-vafā kā naam nahīñ

chand roza hayāt se hāsil

jab mohabbat hī ko davām nahīñ

aadmi kis ka eatibar kare

jab mohabbat hi ko dawam nahin

wo mohabbat bhi kya mohabbat hai

chaar din bhi jise qayam nahin

kashmakash-ha-e-zindagani se

rishta ulfat ka TuT jata hai

chand lamhon ki bad-gumani se

sath barson ka chhuT jata hai

zud-ranj aadmi ki fitrat hai

aur matlab-parast ahl-e-jahan

waqiat-e-jahan mein sang-ba-dast

aur dil kargah-e-shishagaran

kya tajjub hai phir agar is ne

kar diya mahw ahl-e-ulfat ko

ye wafa ka meri sila baKHsha

bhul baiThe meri mohabbat ko

zindagi bhar nibah ke wade

umr bhar ki wafa ke qaul-o-qarar

aah na-paedar the kitne

jaise zulmat mein hon numud-e-sharar

phir bhi us ki taraf se ai hamdam

mere dil mein koi ghubar nahin

jaanta hun ki ek haalat par

gardish-e-charKH ko qarar nahin

kar chuka hun muaf use dil se

phir bhi ek pech-o-tab hai mujh ko

dil ko samjha chuka hun main lekin

zindagani azab hai mujh ko

apni KHuddari-e-wafa ki qasam

nahin rona gham-e-judai ka

us ki masumi-e-ada ki qasam

nahin gham us ki bewafai ka

han magar is jahan se hun bezar

jis mein mehr-o-wafa ka nam nahin

chand roza hayat se hasil

jab mohabbat hi ko dawam nahin