shikast

terā saudā.ī tire paas ba-sad-ijz-o-niyāz

dāġh-e-dil apne dikhāne ko chalā aaya thā

dil pe kyā guzrī zamāne ne sitam kyā Dhaa.e

apnī rūdād sunāne ko chalā aaya thā

thā yaqīñ jab dar-e-mahbūb pe pahuñcheñge to phir

chehra-e-zīst se dhul jā.egī gard-e-ālām

apne dāman meñ chhupā legī phir āġhosh-e-sahar

phir pazīrā.ī ko aa.egī mahaktī huī shaam

aas thī ai mire mahbūb mirī jān-e-hazīñ

tere anfās kī ḳhushbū se mahak jā.egī

tere altāf-o-ināyāt kī gul-rezī se

bāġh-e-hastī kī tahī-dāmanī Dhak jā.egī

terī āñkhoñ meñ vahī pyaar numāyāñ hogā

tere lahje meñ lagāvaT kī vahī ḳhū hogī

khil uTheñge isī andāz se aariz ke gulāb

terī zulfoñ meñ isī chaah kī ḳhushbū hogī

surḳh-rū hoñge ġham-e-dil ġham-e-daurāñ donoñ

phir vahī daur mohabbat kā palaT aa.egā

tere qadmoñ pe dil-e-zār ke sajde hoñge

terī āñkhoñ meñ vahī pyaar simaT aa.egā

duur hogī ġham-e-ayyām kī taptī huī dhuup

terī zulfoñ kā mahaktā huā saayā hogā

maiñ ne samjhā thā tirī pursish-e-ġham se shāyad

dard kam hogā ġham-e-dil kā mudāvā hogā

kyā ḳhabar thī ki tirā pyaar bhī dhokā hogā

ik zarūrat ne kiyā thā tujhe majbūr-e-vafā

maslahat-sāz tabī.at ko chhupāne ke liye

kar liyā tū ne ḳhudā ko bhī mohabbat meñ gavāh

pursish-e-ġham kā to kyā zikr ki is mahfil meñ

maiñ nigāh-e-ġhalat-andāz ke qābil bhī nahīñ

hāsil-e-bazm jise tū ne kabhī samjhā thā

aaj vo jān-e-hazīñ dar-ḳhur-e-mahfil bhī nahīñ

ḳhvāb kyā kyā dil-e-dīvāna ne dekhe the 'niyāz'

kyā bhayānak milī un ḳhvāboñ kī ta.abīr hameñ

ik nayā dard milā ham ko shikast-e-dil kā

ik na.e moḌ pe le aa.ī hai taqdīr hameñ

tera saudai tere pas ba-sad-ijz-o-niyaz

dagh-e-dil apne dikhane ko chala aaya tha

dil pe kya guzri zamane ne sitam kya Dhae

apni rudad sunane ko chala aaya tha

tha yaqin jab dar-e-mahbub pe pahunchenge to phir

chehra-e-zist se dhul jaegi gard-e-alam

apne daman mein chhupa legi phir aaghosh-e-sahar

phir pazirai ko aaegi mahakti hui sham

aas thi ai mere mahbub meri jaan-e-hazin

tere anfas ki KHushbu se mahak jaegi

tere altaf-o-inayat ki gul-rezi se

bagh-e-hasti ki tahi-damani Dhak jaegi

teri aankhon mein wahi pyar numayan hoga

tere lahje mein lagawaT ki wahi KHu hogi

khil uThenge isi andaz se aariz ke gulab

teri zulfon mein isi chah ki KHushbu hogi

surKH-ru honge gham-e-dil gham-e-dauran donon

phir wahi daur mohabbat ka palaT aaega

tere qadmon pe dil-e-zar ke sajde honge

teri aankhon mein wahi pyar simaT aaega

dur hogi gham-e-ayyam ki tapti hui dhup

teri zulfon ka mahakta hua saya hoga

main ne samjha tha teri pursish-e-gham se shayad

dard kam hoga gham-e-dil ka mudawa hoga

kya KHabar thi ki tera pyar bhi dhoka hoga

ek zarurat ne kiya tha tujhe majbur-e-wafa

maslahat-saz tabiat ko chhupane ke liye

kar liya tu ne KHuda ko bhi mohabbat mein gawah

pursish-e-gham ka to kya zikr ki is mahfil mein

main nigah-e-ghalat-andaz ke qabil bhi nahin

hasil-e-bazm jise tu ne kabhi samjha tha

aaj wo jaan-e-hazin dar-KHur-e-mahfil bhi nahin

KHwab kya kya dil-e-diwana ne dekhe the 'niyaz'

kya bhayanak mili un KHwabon ki tabir hamein

ek naya dard mila hum ko shikast-e-dil ka

ek nae moD pe le aai hai taqdir hamein