shiw ki jaTa

maiñ ne maazī ke khañDar meñ jhāñkā

haal kī dhañstī huī ret pe sargardāñ rahā

aur ab DhūñD rahā huuñ ki dhuñdalkoñ meñ kahāñ hai fardā

mere ehsās ke tapte hue sahrāoñ meñ

ek bhī buuñd nahīñ shabnam kī

kitne ḳhvāboñ ke gharauñde TuuTe

kitne sapnoñ ke jazīre Duube

māh-o-sāl aate rahe

jaate rahe

thapkiyāñ de ke sulāte rahe

jazboñ ko mire

vādī-e-mauhūm meñ pahuñchāte rahe

hichkiyāñ letī rahī hasrat-e-dariyā-talabī

roz-o-shab aag kī lapToñ se guzartī hī rahī tishna-labī

kohkan phir sar-e-kohsār na uTThā koī

jū-e-kam-āb bhī afsāna-e-mauhūm banī

vo tamāzat kī sadī aa.ī

ki har samt ubalne lagī jaltī huī ret

ruk ga.iiñ ThanDī havā kī sāñseñ

pankh bhī uudī ghaTāoñ ke jale

shiv kī jaTā suukh ga.ī

main ne mazi ke khanDar mein jhanka

haal ki dhansti hui ret pe sargardan raha

aur ab DhunD raha hun ki dhundalkon mein kahan hai farda

mere ehsas ke tapte hue sahraon mein

ek bhi bund nahin shabnam ki

kitne KHwabon ke gharaunde TuTe

kitne sapnon ke jazire Dube

mah-o-sal aate rahe

jate rahe

thapkiyan de ke sulate rahe

jazbon ko mere

wadi-e-mauhum mein pahunchate rahe

hichkiyan leti rahi hasrat-e-dariya-talabi

roz-o-shab aag ki lapTon se guzarti hi rahi tishna-labi

kohkan phir sar-e-kohsar na uTTha koi

ju-e-kam-ab bhi afsana-e-mauhum bani

wo tamazat ki sadi aai

ki har samt ubalne lagi jalti hui ret

ruk gain ThanDi hawa ki sansen

pankh bhi udi ghaTaon ke jale

shiw ki jaTa sukh gai