shoala-e-hina

ye raat mash.al-e-armāñ jalāne aa.ī hai

magar nazar meñ añdherā sā chhā rahā hai kyoñ

vo ġham-kada jise Thukrā diyā mohabbat ne

bhulā rahī huuñ magar yaad aa rahā hai kyoñ

ye kāmyāb irāde ye muzmahil lamhe

ye aaj ziist meñ āḳhir tazād kaisā hai

hujūm-e-kaif meñ bhī ruuh be-qarār hai kyoñ

ye iztirāb-e-dil-e-nā-murād kaisā hai

qarīb-o-dūr musallat hai ḳhāmushī lekin

fazāoñ meñ kisī tūfāñ kā shor barpā hai

ye raat hai ki qayāmat ye tīrgī hai ki maut

charāġh jal to ga.e haiñ magar añdherā hai

ġham-e-hayāt kī parchhā.iyoñ se Darnā kyā

maiñ zindagī ke na.e ḳhvāb bun ke aa.ī huuñ

ab us dayār meñ vāpas bhī ho nahīñ saktī

ki apnī pusht pe dīvār chun ke aa.ī huuñ

laboñ pe mauj-e-tabassum hai dil meñ gard-e-malāl

maiñ ḳhush to huuñ magar āñkhoñ se ashk bahte haiñ

mirī udaas javānī ne mujh se pūchhā hai

suhāg raat isī bebasī ko kahte haiñ

na baap bhaa.ī ke hoñToñ pe aa.ī koī duā

na maañ ne pyaar se ruḳhsat kiyā gale mil ke

hatheliyoñ meñ hai mehñdī na maañg meñ afshāñ

machal ke rah ga.e siine meñ valvale dil ke

rah-e-hayāt ke sāthī tirā sahārā hai

mirī vafā mirī jur.at kī aabrū rakhnā

tire liye maiñ zamāne ko chhoḌ baiThī huuñ

mire ġhurūr-e-mohabbat kī aabrū rakhnā

ye raat mashal-e-arman jalane aai hai

magar nazar mein andhera sa chha raha hai kyon

wo gham-kada jise Thukra diya mohabbat ne

bhula rahi hun magar yaad aa raha hai kyon

ye kaamyab irade ye muzmahil lamhe

ye aaj zist mein aaKHir tazad kaisa hai

hujum-e-kaif mein bhi ruh be-qarar hai kyon

ye iztirab-e-dil-e-na-murad kaisa hai

qarib-o-dur musallat hai KHamushi lekin

fazaon mein kisi tufan ka shor barpa hai

ye raat hai ki qayamat ye tirgi hai ki maut

charagh jal to gae hain magar andhera hai

gham-e-hayat ki parchhaiyon se Darna kya

main zindagi ke nae KHwab bun ke aai hun

ab us dayar mein wapas bhi ho nahin sakti

ki apni pusht pe diwar chun ke aai hun

labon pe mauj-e-tabassum hai dil mein gard-e-malal

main KHush to hun magar aankhon se ashk bahte hain

meri udas jawani ne mujh se puchha hai

suhag raat isi bebasi ko kahte hain

na bap bhai ke honTon pe aai koi dua

na man ne pyar se ruKHsat kiya gale mil ke

hatheliyon mein hai mehndi na mang mein afshan

machal ke rah gae sine mein walwale dil ke

rah-e-hayat ke sathi tera sahaara hai

meri wafa meri jurat ki aabru rakhna

tere liye main zamane ko chhoD baiThi hun

mere ghurur-e-mohabbat ki aabru rakhna