sina-e-KHwab khule

sīna-e-ḳhvāb khule

jis tarah pyaar meñ Duubī huī āñkhoñ pe laraztī huī

palkoñ kā nasha khultā hai

jis tarah band kitāboñ pe kisī phuul ke khulne kā gumāñ khultā hai

jis tarah haath kī poroñ pe kabhī

pahle pahle se kisī tajraba-e-lams-e-mohabbat kā asar khultā hai

sīna-e-ḳhvāb khule

sīna-e-ḳhvāb khule aur meñ dekhūñ vo kam-āsār javānī kā ḳhumār

vahī hairat jise maiñ ne faqat ek saañs kī Dorī

meñ piro lene kī ḳhvāhish kī thī

vo tazabzub ki jise kam-sin-o-kam-ḳhvāb' nigāhoñ ke bharose ne

gulāb aur chamelī kī mahak baḳhshī thī

murta.ish hoñToñ pe mauhūm tabassum kā vo ehsās jise

harf-o-āvāz baġhair

ka.aba-e-dil ne tire chehra-e-gulfām pe mab.ūs kiyā

aur phir merī nigāhoñ kī taraf

tere āġhāz ko bedār kiyā

ai suḳhan-sāz nigāhoñ vaale

vaqt ne umr-e-guzishta ke ka.ī baab likhe

aur har baab kī dahlīz kisī ḳhvāb-e-muqaffal kī tarah gum-sum hai

koī dastak koī āvāz koī harf-e-sabā

koī tadbīr ki is lamha-e-maujūd ke mar jaane se pahle pahle

kaash is ḳhvāb-e-muqaffal kā bhī siina khul jaa.e

aur maiñ dekh sakūñ

tere mauhūm tabassum kī kahānī kā havāla kyā thā

aur ab mujh se gunahgār-e-mohabbat kī tabāhī kā izāla kyā hai

sina-e-KHwab khule

jis tarah pyar mein Dubi hui aankhon pe larazti hui

palkon ka nasha khulta hai

jis tarah band kitabon pe kisi phul ke khulne ka guman khulta hai

jis tarah hath ki poron pe kabhi

pahle pahle se kisi tajraba-e-lams-e-mohabbat ka asar khulta hai

sina-e-KHwab khule

sina-e-KHwab khule aur mein dekhun wo kam-asar jawani ka KHumar

wahi hairat jise main ne faqat ek sans ki Dori

mein piro lene ki KHwahish ki thi

wo tazabzub ki jise kam-sin-o-kam-KHwab' nigahon ke bharose ne

gulab aur chameli ki mahak baKHshi thi

murtaish honTon pe mauhum tabassum ka wo ehsas jise

harf-o-awaz baghair

kaba-e-dil ne tere chehra-e-gulfam pe mabus kiya

aur phir meri nigahon ki taraf

tere aaghaz ko bedar kiya

ai suKHan-saz nigahon wale

waqt ne umr-e-guzishta ke kai bab likhe

aur har bab ki dahliz kisi KHwab-e-muqaffal ki tarah gum-sum hai

koi dastak koi aawaz koi harf-e-saba

koi tadbir ki is lamha-e-maujud ke mar jaane se pahle pahle

kash is KHwab-e-muqaffal ka bhi sina khul jae

aur main dekh sakun

tere mauhum tabassum ki kahani ka hawala kya tha

aur ab mujh se gunahgar-e-mohabbat ki tabahi ka izala kya hai