silsila-e-mukalimat-e-KHud-kalami

kab se is ātish-e-nafas kā

ye dabistān-e-qadīm

chal rahā thā nā-gahāñ

niklā natīja

imtihān ilm-e-asmā kā

tabhī se

rah ga.ī ho kar muqaffal ye imārat

aur chhuTTī par moallim

apne hujre meñ muqīm

ādam-e-ḳhākī kī paidā.ish se pahle

jin kā kahnā thā zamīñ par

ḳhuun bahā.egā ye nāhaq

aur machā.egā fasād

ab vahī peshengo umīd-vār

is ke gun gaate hue thakte nahīñ

imtihān-gāh-e-muqaddar ho to aisī

jis meñ pur-tāb-o-tavāñ ham

kār-pardāzān-e-fitrat lā-javāb

aur aadam us kī tīnat meñ to goyā

hal-shuda pahle se the saare savāl

jin mazāhir kī taraf dekhā nazar bhar kar

ma.ānī ke damak aThe unhīñ meñ muzmirāt

hikmat-e-ashyā ke sāñche meñ Dhalī

be-sāḳhta ism-āfrīnī marhabā

ḳhāk-e-be-miqdār ke zarrāt meñ

jauhar-e-nutq-o-bayāñ aisā bhī maḳhfī hai

kise ma.alūm thā

imtihāñ ḳhatm

aur masjūd-e-malā.ik ban ga.ī insāñ kī zaat

maiñ ne lekin sheva-e-inkār apnāyā

ki maiñ ātish-e-nihād

martabe meñ ḳhāk-e-uftāda se bartar

asl meñ vaalā guhar

chāhe aflāk-o-zamīn par

phail kar chhā jaa.e ye musht-e-ġhubār

harba tasḳhīr lekin kārgar mujh par bhī ho is kā

yahī ik marhala hai ma.arke kā

imtihāñ ye saḳht-tar hai

kāmyābī is meñ bhī paa.e yahī

umīd-vār ḳhush-gumāñ

āsāñ nahīñ

merī apnī ik luġhat hai

jis meñ asmā ke ma.ānī bār-bār

ik na.ī ta.abīr ke ā.īna-dār

mansab-e-āzādgī aadam kā

ik parvāna-e-ġhārat-garī

is meñ likhā hai

aur āgāhī

tabāhī ke vasā.el tak rasā.ī kā javāz

is meñ chhapā hai

al-ġharaz is khel kā mohara vahī

ilm-e-asmā hai magar

ik pur-fusūñ taqlīb-kārī kā shikār

ik pur-fusūñ taqlīb-kārī kā shikār

kab se is aatish-e-nafas ka

ye dabistan-e-qadim

chal raha tha na-gahan

nikla natija

imtihan ilm-e-asma ka

tabhi se

rah gai ho kar muqaffal ye imarat

aur chhuTTi par moallim

apne hujre mein muqim

aadam-e-KHaki ki paidaish se pahle

jin ka kahna tha zamin par

KHun bahaega ye nahaq

aur machaega fasad

ab wahi peshengo umid-war

is ke gun gate hue thakte nahin

imtihan-gah-e-muqaddar ho to aisi

jis mein pur-tab-o-tawan hum

kar-pardazan-e-fitrat la-jawab

aur aadam us ki tinat mein to goya

hal-shuda pahle se the sare sawal

jin mazahir ki taraf dekha nazar bhar kar

maani ke damak aThe unhin mein muzmiraat

hikmat-e-ashya ke sanche mein Dhali

be-saKHta ism-afrini marhaba

KHak-e-be-miqdar ke zarraat mein

jauhar-e-nutq-o-bayan aisa bhi maKHfi hai

kise malum tha

imtihan KHatm

aur masjud-e-malaik ban gai insan ki zat

main ne lekin shewa-e-inkar apnaya

ki main aatish-e-nihad

martabe mein KHak-e-uftada se bartar

asl mein wala guhar

chahe aflak-o-zamin par

phail kar chha jae ye musht-e-ghubar

harba tasKHir lekin kargar mujh par bhi ho is ka

yahi ek marhala hai marke ka

imtihan ye saKHt-tar hai

kaamyabi is mein bhi pae yahi

umid-war KHush-guman

aasan nahin

meri apni ek lughat hai

jis mein asma ke maani bar-bar

ek nai tabir ke aaina-dar

mansab-e-azadgi aadam ka

ek parwana-e-ghaarat-gari

is mein likha hai

aur aagahi

tabahi ke wasael tak rasai ka jawaz

is mein chhapa hai

al-gharaz is khel ka mohara wahi

ilm-e-asma hai magar

ek pur-fusun taqlib-kari ka shikar

ek pur-fusun taqlib-kari ka shikar