sirr-e-hasti

apnī hastī ko na samjhā jo vo insāñ huuñ meñ

kaun huuñ kyā huuñ use soch ke hairāñ huuñ meñ

huuñ gul-e-tar koī yā ḳhār-e-muġhīlāñ huuñ maiñ

dard-e-sar huuñ ki kisī dard kā darmāñ huuñ maiñ

raaz huuñ dīda-e-idrāk se pinhāñ huuñ maiñ

laakh sar maarā magar uqda-e-ma.anī na khulā

kaun huuñ kyā huuñ maiñ sad-haif na samjhā aslan

naqsh miT-miT ke banā zehn pe ban-ban ke miTā

vo jo tasvīr ke sāñche meñ kabhī Dhal na sakā

ik musavvir kā vo taḳh.īl-e-pareshāñ huuñ maiñ

vo jo jannat se nikālā gayā aadam maiñ huuñ

naar gulzār huī jis pe vo mahram maiñ huuñ

maiñ hī namrūd huuñ fir.aun-e-mujassam maiñ huuñ

maiñ hī muusā huuñ dam-e-īsā-e-mariyam maiñ huuñ

phir bhī ik ḳhāmushī-e-gor-e-ġharībāñ huuñ maiñ

daur-e-zulmat kā har ik naqsh miTāyā maiñ ne

vahm ko durr-e-haqīqat se sajāyā maiñ ne

mash.al-e-rāh-e-amal kun ko banāyā maiñ ne

jab se tadbīr ko siine se lagāyā maiñ ne

apnī taqdīr se bhī dast-o-garebāñ huuñ maiñ

maiñ jo chāhūñ ġham-e-hastī kā izāla kar duuñ

zulmat-e-baḳht ko ik pal meñ ujālā kar duuñ

dair ko ka.aba to ka.aba ko shivāla kar duuñ

zarre-zarre ko jahāñ ke tah-o-bālā kar duuñ

pā-ba-jaulāñ huuñ magar hashr-ba-dāmāñ huuñ maiñ

qa.ar-e-dariyā ko jo chāhūñ to kināra kar duuñ

ġhaiz meñ aa.uuñ to paanī ko sharāra kar duuñ

misl-e-sīmāb samundar ko do-pāra kar duuñ

chāñd TukḌe ho jo unglī se ishāra kar duuñ

apnī quvvat pe ḳhud angusht-ba-dandāñ huuñ maiñ

hai musallam abadī ḳhāliq-e-akbar kā vajūd

roz-e-raushan meñ ho jaise shah-e-ḳhāvar kā vajūd

be-haqīqat hai magar ḳhaak ke paikar kā vajūd

nā-tavāñ zarre se baḌh kar nahīñ manzar kā vajūd

qatra-e-āb huuñ ashk-e-sar-e-mizhgāñ huuñ maiñ

apni hasti ko na samjha jo wo insan hun mein

kaun hun kya hun use soch ke hairan hun mein

hun gul-e-tar koi ya KHar-e-mughilan hun main

dard-e-sar hun ki kisi dard ka darman hun main

raaz hun dida-e-idrak se pinhan hun main

lakh sar mara magar uqda-e-mani na khula

kaun hun kya hun main sad-haif na samjha aslan

naqsh miT-miT ke bana zehn pe ban-ban ke miTa

wo jo taswir ke sanche mein kabhi Dhal na saka

ek musawwir ka wo taKHil-e-pareshan hun main

wo jo jannat se nikala gaya aadam main hun

nar gulzar hui jis pe wo mahram main hun

main hi namrud hun firaun-e-mujassam main hun

main hi musa hun dam-e-isa-e-mariyam main hun

phir bhi ek KHamushi-e-gor-e-ghariban hun main

daur-e-zulmat ka har ek naqsh miTaya main ne

wahm ko durr-e-haqiqat se sajaya main ne

mashal-e-rah-e-amal kun ko banaya main ne

jab se tadbir ko sine se lagaya main ne

apni taqdir se bhi dast-o-gareban hun main

main jo chahun gham-e-hasti ka izala kar dun

zulmat-e-baKHt ko ek pal mein ujala kar dun

dair ko kaba to kaba ko shiwala kar dun

zarre-zarre ko jahan ke tah-o-baala kar dun

pa-ba-jaulan hun magar hashr-ba-daman hun main

qar-e-dariya ko jo chahun to kinara kar dun

ghaiz mein aaun to pani ko sharara kar dun

misl-e-simab samundar ko do-para kar dun

chand TukDe ho jo ungli se ishaara kar dun

apni quwwat pe KHud angusht-ba-dandan hun main

hai musallam abadi KHaliq-e-akbar ka wajud

roz-e-raushan mein ho jaise shah-e-KHawar ka wajud

be-haqiqat hai magar KHak ke paikar ka wajud

na-tawan zarre se baDh kar nahin manzar ka wajud

qatra-e-ab hun ashk-e-sar-e-mizhgan hun main