sitaron ki aawaz

chalte chalte mirī niiñd TuuTī to dekhā

har ik samt tārīk asrār

patthar kī mānind

raste kī dīvār the

phir sitāroñ ne paiġhām-e-rif.at diyā

aur ḳhvāboñ ke jhoñke

mere zehn-e-ma.asūm meñ lahlahāne lage

mere par phaḌphaḌāne lage

phir bhī parvāz ke vāste maiñ ne jumbish jo kī

maiñ ne dekhā ki bechārgī

mere qadmoñ kī zanjīr banñe lagī

maiñ faqat ek be-bāl-o-par

tang-o-tārīk ġhāroñ kā insān thā

phir sitāroñ ne āvāz dī

ye sitāre jo insāñ kī āvāz haiñ

ye sitāre jo insān kī rūh-e-parvāz haiñ

un kī āvāz par maiñ ne jumbish jo kī

merī zanjīr TuuTī

mire devtā mujh se sahme hue

mujh se kuchh duur par dast-basta khaḌe the

maiñ aage baḌhā

merī yalġhār se bahr-o-dasht-o-jabal zar ugalne lage

maiñ bahut ḳhush huā

aur is zar se ik āsmāñ tak pahuñchne kī sīḌhī banāne lagā

ek zarrīñ chamaktā huā zīna-e-āsmānī

aur aage baḌhā

ab mire haath dhartī se uupar fazāoñ meñ lahrā rahe the

magar vo sitāre bahut duur the merā ziina bahut muḳhtasar thā

to phir

maiñ ne inkār ke par lagā kar jo parvāz kī

merā ziina hī mujh se ulajhne lagā

aur ġhāroñ ke vo devtā

tanz se muskurāne lage

phir sitāroñ ne āvāz dī

apne hāthoñ se ḳhud apne ziine ko nīche girā kar baḌhā

maiñ fazā meñ uḌā

aur vo vaqt bhī aa gayā

jab hudūd-e-havā

merī parvāz kī raah meñ ek dīvār sī ban ga.ī

devtā muskurāne lage

phir sitāroñ ne āvāz dī

merī himmat baḌhī

apne ḳhvāboñ kī duniyā sameTe hue

maiñ baḌe azm ke saath dhartī par utrā

ḳhalāoñ meñ parvāz kī

aaj pahlā qadam chāñd par hai magar

haiñ sitāre abhī duur tārīkiyoñ meñ kahīñ jalva-gar

un kī āvāz gītoñ ke sargam meñ bhar lī magar

ab vahī mere paañv kī zanjīr haiñ

ek ziddī sī zanjīr haiñ

devtāoñ ne jis ko banāyā mujhe rokne ke liye

aur sitāroñ ne āvāz dī hai sadā

mere ḳhvāboñ kā lashkar umīdoñ kā sūraj liye

mere gītoñ kī duniyā meñ naġhmoñ ke bādal

par uḌne lagā

aur ye bādal chamakne lage kahkashāñ kī tarah

aur ab devtā

tang-o-tārīk ġhāroñ meñ ḳhud ko chhupāne lage

chalte chalte meri nind TuTi to dekha

har ek samt tarik asrar

patthar ki manind

raste ki diwar the

phir sitaron ne paigham-e-rifat diya

aur KHwabon ke jhonke

mere zehn-e-masum mein lahlahane lage

mere par phaDphaDane lage

phir bhi parwaz ke waste main ne jumbish jo ki

main ne dekha ki bechaargi

mere qadmon ki zanjir banne lagi

main faqat ek be-baal-o-par

tang-o-tarik ghaaron ka insan tha

phir sitaron ne aawaz di

ye sitare jo insan ki aawaz hain

ye sitare jo insan ki ruh-e-parwaz hain

un ki aawaz par main ne jumbish jo ki

meri zanjir TuTi

mere dewta mujh se sahme hue

mujh se kuchh dur par dast-basta khaDe the

main aage baDha

meri yalghaar se bahr-o-dasht-o-jabal zar ugalne lage

main bahut KHush hua

aur is zar se ek aasman tak pahunchne ki siDhi banane laga

ek zarrin chamakta hua zina-e-asmani

aur aage baDha

ab mere hath dharti se upar fazaon mein lahra rahe the

magar wo sitare bahut dur the mera zina bahut muKHtasar tha

to phir

main ne inkar ke par laga kar jo parwaz ki

mera zina hi mujh se ulajhne laga

aur ghaaron ke wo dewta

tanz se muskurane lage

phir sitaron ne aawaz di

apne hathon se KHud apne zine ko niche gira kar baDha

main faza mein uDa

aur wo waqt bhi aa gaya

jab hudud-e-hawa

meri parwaz ki rah mein ek diwar si ban gai

dewta muskurane lage

phir sitaron ne aawaz di

meri himmat baDhi

apne KHwabon ki duniya sameTe hue

main baDe azm ke sath dharti par utra

KHalaon mein parwaz ki

aaj pahla qadam chand par hai magar

hain sitare abhi dur tarikiyon mein kahin jalwa-gar

un ki aawaz giton ke sargam mein bhar li magar

ab wahi mere panw ki zanjir hain

ek ziddi si zanjir hain

dewtaon ne jis ko banaya mujhe rokne ke liye

aur sitaron ne aawaz di hai sada

mere KHwabon ka lashkar umidon ka suraj liye

mere giton ki duniya mein naghmon ke baadal

par uDne laga

aur ye baadal chamakne lage kahkashan ki tarah

aur ab dewta

tang-o-tarik ghaaron mein KHud ko chhupane lage