soch rahi hun

gūñgī hotī huī ḳhāmoshī

sannāTe kī dahlīz pakaḌ kar

jaane kab tak jamī rahegī

maiñ vo lafz hī bhuul aa.ī huuñ

raste meñ hī girā aa.ī huuñ

jo tum se milne aa.e the

jānte ho tum

lafz mirī dhaḌkan the us pal

siine meñ ik hashr bapā thā

surḳhī kā pairāhan oḌhe

mere sajīle lafz vo saare

sapnoñ ke rañgīn mahal meñ

rahne ko be-tāb bahut the

tum shāyad kuchh kah do un se

ik ma.asūm sī ḳhvāhish le kar

paas tumhāre aa baiThe the

lekin

tum ne jaan hī le lī un kī

jīte-jāgte lafz vo saare

zard paḌe bas takte rah ga.e

aur phir is par

sard barf sā lahja tumhārā

lafz to jaise marne lage the

dil kī dhaḌkan ruk sī ga.ī thī

sard paḌtī vo lāsheñ un kī

jis pal maiñ ne sameTī thiiñ

vīrāñ hote siine meñ

un kī qabreñ khodī thiiñ

aur unheñ dafnāyā thā

jis siine meñ hashr bapā thā

ab sannāTe gūñjte haiñ

maiñ chup le kar aa.ī huuñ

rose larazte hāthoñ se

ashkoñ meñ ik bhīgī huī

chādar un pe chaḌhātī huuñ

soch rahī huuñ

gūñgī hotī huī ḳhāmoshī

sannāTe kī dahlīz pakaḌ kar

jaane kab tak jamī rahegī

gungi hoti hui KHamoshi

sannaTe ki dahliz pakaD kar

jaane kab tak jami rahegi

main wo lafz hi bhul aai hun

raste mein hi gira aai hun

jo tum se milne aae the

jaante ho tum

lafz meri dhaDkan the us pal

sine mein ek hashr bapa tha

surKHi ka pairahan oDhe

mere sajile lafz wo sare

sapnon ke rangin mahal mein

rahne ko be-tab bahut the

tum shayad kuchh kah do un se

ek masum si KHwahish le kar

pas tumhaare aa baiThe the

lekin

tum ne jaan hi le li un ki

jite-jagte lafz wo sare

zard paDe bas takte rah gae

aur phir is par

sard barf sa lahja tumhaara

lafz to jaise marne lage the

dil ki dhaDkan ruk si gai thi

sard paDti wo lashen un ki

jis pal main ne sameTi thin

viran hote sine mein

un ki qabren khodi thin

aur unhen dafnaya tha

jis sine mein hashr bapa tha

ab sannaTe gunjte hain

main chup le kar aai hun

rose larazte hathon se

ashkon mein ek bhigi hui

chadar un pe chaDhati hun

soch rahi hun

gungi hoti hui KHamoshi

sannaTe ki dahliz pakaD kar

jaane kab tak jami rahegi