soKHta jism ka libas

libās jal kar mire badan par chipak gayā hai

badan musalsal sulag rahā hai

kahīñ kahīñ bhūle bhaTke sho.ale

uThā ke lau sar kī ab bhī

bāhar ko jhūlte haiñ

jinheñ maiñ apnī

jalī hathelī kī pusht se ḳhud dabā rahā huuñ

alaav se bāhar aa ke

dahshat-zada nigāhoñ se dekhtā huuñ

kahīñ se ab ambulance aa.egī merī jānib

koī masīhā-nafas sambhālegā aage baḌh kar

magar yahāñ to

koī masīhā-nafas nahīñ hai

maiñ chīḳhtā huuñ koī to hogā

koī to be-iḳhtiyār merī taraf bhī aa.e

badan se chimTī qabā ko ḳhud hī

bachī khuchī uñgliyoñ kī poroñ

se chhū ke mahsūs kar rahā huuñ

ki jism hai yā jalā huā pairahan hai merā

jo merī miTTī meñ dhañs rahā hai

aziyyatoñ kī gavāhī detā hai ḳhaliya ḳhaliya

jakaḌ chukā huuñ maiñ is kī partoñ meñ chāhtā huuñ

ki khīñch Dālūñ

utaar pheñkūñ ise magar ab

ise utārūñ

to khaal merī hī khīñch legā

aur in sulagtī

bachī khuchī uñgliyoñ kī poroñ se nāḳhunoñ se

kurednā bhī nahīñ hai bas meñ

jo pairahan thā

vo pairahan ab mirā qafas hai

jo pairahan thā

vo pairahan ab mirā badan hai

libas jal kar mere badan par chipak gaya hai

badan musalsal sulag raha hai

kahin kahin bhule bhaTke shoale

uTha ke lau sar ki ab bhi

bahar ko jhulte hain

jinhen main apni

jali hatheli ki pusht se KHud daba raha hun

alaw se bahar aa ke

dahshat-zada nigahon se dekhta hun

kahin se ab ambulance aaegi meri jaanib

koi masiha-nafas sambhaalega aage baDh kar

magar yahan to

koi masiha-nafas nahin hai

main chiKHta hun koi to hoga

koi to be-iKHtiyar meri taraf bhi aae

badan se chimTi qaba ko KHud hi

bachi khuchi ungliyon ki poron

se chhu ke mahsus kar raha hun

ki jism hai ya jala hua pairahan hai mera

jo meri miTTi mein dhans raha hai

aziyyaton ki gawahi deta hai KHaliya KHaliya

jakaD chuka hun main is ki parton mein chahta hun

ki khinch Dalun

utar phenkun ise magar ab

ise utarun

to khaal meri hi khinch lega

aur in sulagti

bachi khuchi ungliyon ki poron se naKHunon se

kuredna bhi nahin hai bas mein

jo pairahan tha

wo pairahan ab mera qafas hai

jo pairahan tha

wo pairahan ab mera badan hai