sone se pahle ek KHayal

mujhe november kī dhuup kī tarah mat chāho

ki is meñ Duubo to tamāzat meñ nahā jaao

aur is se alag ho to

ThanDak ko por por meñ utartā dekho

mujhe sāvan ke bādal kī tarah chāho

ki us kā saaya bahut gahrā

nas nas meñ pyaas bujhāne vaalā

magar us kā vajūd pal meñ havā

pal meñ paanī kā Dher

mujhe shaam kī shafaq kī tarah mat chāho

ki āsmān ke qurmuzī rañgoñ kī tarah

mere gaal surḳh

magar lamha-bhar ba.ad

hijr meñ nahā kar, raat sī mailī mailī

mujhe chaltī havā kī tarah mat chāho

ki jis ke qayām se dam ghuTtā hai

aur jis kī tez-ravī qadam ukheḌ detī hai

mujhe Thahre paanī kī tarah mat chāho

ki maiñ is meñ kañval ban ke nahīñ rah saktī huuñ

mujhe bas itnā chāho

ki mujh meñ chāhe jaane kī ḳhvāhish jaag uThe!

mujhe nowember ki dhup ki tarah mat chaho

ki is mein Dubo to tamazat mein naha jao

aur is se alag ho to

ThanDak ko por por mein utarta dekho

mujhe sawan ke baadal ki tarah chaho

ki us ka saya bahut gahra

nas nas mein pyas bujhane wala

magar us ka wajud pal mein hawa

pal mein pani ka Dher

mujhe sham ki shafaq ki tarah mat chaho

ki aasman ke qurmuzi rangon ki tarah

mere gal surKH

magar lamha-bhar baad

hijr mein naha kar, raat si maili maili

mujhe chalti hawa ki tarah mat chaho

ki jis ke qayam se dam ghuTta hai

aur jis ki tez-rawi qadam ukheD deti hai

mujhe Thahre pani ki tarah mat chaho

ki main is mein kanwal ban ke nahin rah sakti hun

mujhe bas itna chaho

ki mujh mein chahe jaane ki KHwahish jag uThe!