sote mein muskuraate bachche ko dekh kar

tirī maḳhmūr sī muskān abhī dekhī to yaad aayā

mirī muskān par ik din mujhe maañ ne batāyā thā ki chhoTā thā to aksar niiñd meñ maiñ muskurātā thā

(ulūhī uñgliyoñ kī chheḌ kā mīThā tarannum mere lab par raqs kartā thaa)

ki jaise gudgudī ke ik latīf ehsās kī qulqul se merī niiñd hañstī thī

ye guzre kal kā qissa hai, vo guzre kal kī bastī thī

ḳhudā kā aur maañ kā aur bachpan kā zamāna thā

vo jis meñ jī rahā thā maiñ asātīrī zamānoñ kā koī pahlā fasāna thā

ki ahd-e-be-ḳhudā meñ be-amāñ be-sā.ebāñ huuñ maiñ

sau niiñd aatī nahīñ mujh ko, aur aa.e bhī to Dar kī chaap se har ḳhvāb kaañp uTThe

sau marg-e-ḳhvāb kī rut meñ

tirī maḳhmūr sī muskān abhī dekhī to vīrāñ-ḳhāna-e-lab se duā niklī

ḳhudā kī aur terī chheḌ yūñhī umar bhī Thahre

ulūhī uñgliyoñ kā lams daa.im mo'tabar Thahre

tire har ḳhvāb ke us paar ik ḳhvāb-e-digar Thahre

teri maKHmur si muskan abhi dekhi to yaad aaya

meri muskan par ek din mujhe man ne bataya tha ki chhoTa tha to aksar nind mein main muskuraata tha

(uluhi ungliyon ki chheD ka miTha tarannum mere lab par raqs karta tha)

ki jaise gudgudi ke ek latif ehsas ki qulqul se meri nind hansti thi

ye guzre kal ka qissa hai, wo guzre kal ki basti thi

KHuda ka aur man ka aur bachpan ka zamana tha

wo jis mein ji raha tha main asatiri zamanon ka koi pahla fasana tha

ki ahd-e-be-KHuda mein be-aman be-saeban hun main

sau nind aati nahin mujh ko, aur aae bhi to Dar ki chap se har KHwab kanp uTThe

sau marg-e-KHwab ki rut mein

teri maKHmur si muskan abhi dekhi to viran-KHana-e-lab se dua nikli

KHuda ki aur teri chheD yunhi umar bhi Thahre

uluhi ungliyon ka lams daim mo'tabar Thahre

tere har KHwab ke us par ek KHwab-e-digar Thahre