subh ehsas ki chadar pe

sub.h ehsās kī chādar pe

tabassum ke phuul jā-ba-jā bikhre the

yādoñ kī ḳhushbū meñ

raat guzrī thī baġhal-gīr unhīñ saḌkoñ pe

jin ke donoñ taraf the peḌ gul-mohar ke ka.ī

jism pe Tāñke hue narm se ḳhvāboñ ke phuul

hayā se surḳh magar hañste hue

sub.h ehsās kī chādar kī silvaToñ pe ka.ī

muskurāte hue lamhoñ ne gudgudī kī thī

sub.h ehsās kī chādar pe namī thī aisī

ġhusl ke ba.ad bahut hī hasīñ koī lamha

jism ko pochhe binā leT gayā ho jaise

sub.h ehsās kī chādar kī vo bhīnī ḳhushbū

din ke ik muḳhtasar se hisse tak

ek masrūf saḌak kī girāñ haqīqat meñ

apne hone kā ik ehsās to dilvātī rahī

phir vo traffic kā dhuāñ phir vo shānoñ kī ragaḌ

phir pasīne kī vo bū

rikshe vaale se zarā sī takrār chand sikkoñ ke liye

aur pocket meñ vo jhankār unhīñ sikkoñ kī

ik guzartī huī local bus se kuchh dhuāñ

aur vo diesel kī bū

jism meñ chubhtī huī din kī balā kī garmī

din kī is bhiiḌ meñ bas raah banāne ke liye

bhīnī ḳhushbū kā vo nanhā sā haath

jaane kab chhūT gayā

ye pata bhī na chalā

subh ehsas ki chadar pe

tabassum ke phul ja-ba-ja bikhre the

yaadon ki KHushbu mein

raat guzri thi baghal-gir unhin saDkon pe

jin ke donon taraf the peD gul-mohar ke kai

jism pe Tanke hue narm se KHwabon ke phul

haya se surKH magar hanste hue

subh ehsas ki chadar ki silwaTon pe kai

muskuraate hue lamhon ne gudgudi ki thi

subh ehsas ki chadar pe nami thi aisi

ghusl ke baad bahut hi hasin koi lamha

jism ko pochhe bina leT gaya ho jaise

subh ehsas ki chadar ki wo bhini KHushbu

din ke ek muKHtasar se hisse tak

ek masruf saDak ki giran haqiqat mein

apne hone ka ek ehsas to dilwati rahi

phir wo traffic ka dhuan phir wo shanon ki ragaD

phir pasine ki wo bu

rikshe wale se zara si takrar chand sikkon ke liye

aur pocket mein wo jhankar unhin sikkon ki

ek guzarti hui local bus se kuchh dhuan

aur wo diesel ki bu

jism mein chubhti hui din ki bala ki garmi

din ki is bhiD mein bas rah banane ke liye

bhini KHushbu ka wo nanha sa hath

jaane kab chhuT gaya

ye pata bhi na chala