suKHan-e-wapsin

davā se kuchh na huā aur duā se kuchh na milā

bashar ne kuchh na diyā aur ḳhudā se kuchh na milā

zavāl merā muqaddar banā ke chhoḌ diyā

mujhe ḳhyāl-o-hadīs-e-baqā se kuchh na milā

maiñ dard-o-dāġh-e-yatīmī meñ yuuñ rahā mahsūr

pidar se kuchh na milā māmtā se kuchh na milā

jahān-e-ilm-o-hunar meñ to sarfarāz rahā

dayār-e-shauq meñ merī vafā se kuchh na milā

maiñ apne aap meñ jhāñkā to ye sadā aa.ī

ḳhudī se kuchh na milā aur anā se kuchh na milā

kisī ne dīda-e-bīnā kī raushnī le lī

kahūñ maiñ kis se tirī is adā se kuchh na milā

maiñ ḳhālī haath chalā aa rahā huuñ terī taraf

tujhe batāne ki terī atā se kuchh na milā

tire jahān se ḳhāmosh chal diyā 'mas.ūd'

navā-e-sher ko is be-navā se kuchh na milā

dawa se kuchh na hua aur dua se kuchh na mila

bashar ne kuchh na diya aur KHuda se kuchh na mila

zawal mera muqaddar bana ke chhoD diya

mujhe KHyal-o-hadis-e-baqa se kuchh na mila

main dard-o-dagh-e-yatimi mein yun raha mahsur

pidar se kuchh na mila mamta se kuchh na mila

jahan-e-ilm-o-hunar mein to sarfaraaz raha

dayar-e-shauq mein meri wafa se kuchh na mila

main apne aap mein jhanka to ye sada aai

KHudi se kuchh na mila aur ana se kuchh na mila

kisi ne dida-e-bina ki raushni le li

kahun main kis se teri is ada se kuchh na mila

main KHali hath chala aa raha hun teri taraf

tujhe batane ki teri ata se kuchh na mila

tere jahan se KHamosh chal diya 'masud'

nawa-e-sher ko is be-nawa se kuchh na mila