suno laDke

suno ai laḌke

tumhārī āñkhoñ ke siyāh halqe

tumhārī phīkī paḌī ye rangat

tumhārā ye murjhāyā huā chehra sab batā rahā hai

ki kis tarah tum ne ḳhud ko noch khāyā

āḳhir kab tak ye kahāniyoñ meñ base kirdāroñ meñ

tum ḳhud ko dekhte rahoge

dekho mohabbat koī maañ kā laal nahīñ

jise tum ne siine se lagā liyā hai

kab tak afsānvī kahāniyoñ ke kirdāroñ ko

ḳhud se joḌte rahoge

dekho laḌke koī apnī maañ kā ḳhayāl karo

jo saarā din musalle par du'āoñ ke pahāḌ tā'mīr kartī rahtī hai

kab tak yuuñ pāgaloñ se udhār liye qahqahoñ se

tum apnī maañ se milte rahoge

shaam ko ghar lauTtā har parinda mujh se terā patā pūchhtā hai

aur mere paas udāsī kī ek aah ke 'alāva kuchh bhī nahīñ

suno ai laḌke lauT aao kafka kī un kahāniyoñ se

jinheñ vo chaah kar bhī jalā na paayā

ai mere shā'ir tum nikal aao us duniyā se

dekho mohabbatoñ meñ ye sab to hotā hī rahtā hai

kisī ko chāhā jaañ se baḌh kar

phir agle hī lamhe use bhulāyā

ye mohabbatoñ kā rivāj hai

suno ai laḌke kab tak yuuñ ḳhud ko virginia kī tarah

nā-ummīdī ke ḳhutūt likhte rahoge

tumhāre Table par in depression kī adviyāt kā kyā kaam

tumhāre kamre kā ye māhaul kisī udaas jangal jaisā kyoñ hai

ye tumhārī diary ke aurāq par lagā ḳhuun kaisā

ye cigarettoñ ke TukḌe ye chand purāne ḳhutūt

ye tumhārī chārpā.ī ke nīche thūkā ḳhuun kaisā

ye tumhāre bāzuoñ par zaḳhm kaise

ye nā-umīdī kī kitāboñ se bharā kamrā

o mere ḳhudā ai laḌke tum kin rāstoñ pe nikal chuke ho

ḳhudā ke liye tum ḳhud pe thoḌī tavajjoh de do

lauT aao ai mere shā'ir

is se pahle ki tum kisī udaas kahānī kā kirdār ban jaao

lauT aao ai mere shā'ir lauT aao

suno ai laDke

tumhaari aankhon ke siyah halqe

tumhaari phiki paDi ye rangat

tumhaara ye murjhaya hua chehra sab bata raha hai

ki kis tarah tum ne KHud ko noch khaya

aaKHir kab tak ye kahaniyon mein base kirdaron mein

tum KHud ko dekhte rahoge

dekho mohabbat koi man ka lal nahin

jise tum ne sine se laga liya hai

kab tak afsanwi kahaniyon ke kirdaron ko

KHud se joDte rahoge

dekho laDke koi apni man ka KHayal karo

jo sara din musalle par du'aon ke pahaD ta'mir karti rahti hai

kab tak yun pagalon se udhaar liye qahqahon se

tum apni man se milte rahoge

sham ko ghar lauTta har parinda mujh se tera pata puchhta hai

aur mere pas udasi ki ek aah ke 'alawa kuchh bhi nahin

suno ai laDke lauT aao kafka ki un kahaniyon se

jinhen wo chah kar bhi jala na paya

ai mere sha'ir tum nikal aao us duniya se

dekho mohabbaton mein ye sab to hota hi rahta hai

kisi ko chaha jaan se baDh kar

phir agle hi lamhe use bhulaya

ye mohabbaton ka riwaj hai

suno ai laDke kab tak yun KHud ko wirginia ki tarah

na-ummidi ke KHutut likhte rahoge

tumhaare Table par in depression ki adwiyat ka kya kaam

tumhaare kamre ka ye mahaul kisi udas jangal jaisa kyon hai

ye tumhaari diary ke auraq par laga KHun kaisa

ye cigaretton ke TukDe ye chand purane KHutut

ye tumhaari chaarpai ke niche thuka KHun kaisa

ye tumhaare bazuon par zaKHm kaise

ye na-umidi ki kitabon se bhara kamra

o mere KHuda ai laDke tum kin raston pe nikal chuke ho

KHuda ke liye tum KHud pe thoDi tawajjoh de do

lauT aao ai mere sha'ir

is se pahle ki tum kisi udas kahani ka kirdar ban jao

lauT aao ai mere sha'ir lauT aao