suraj ka aatish-kada

sochtā huuñ

vaqt kī gardan pakaḌ kar

reshmī scarf kā phandā lagā kar

khīñch luuñ

aur itnī zor se chīḳhūñ

zamīñ se

āsmāñ tak

sirf merī chīḳh hī kā shor gūñje

vaqt kī martī huī āvāz koī sun na paa.e

sochtā huuñ

vus.at-e-āfāq meñ parvāz kar ke

raat kī āñkhoñ meñ tārīkī kā parda Daal kar maiñ

chāñd tāroñ ko churā lā.ūñ zamīñ par

aur thoḌī der

bachchoñ kī tarah ḳhush ho ke khelūñ

khelne se bhī jab apnā dil na bahle

ek patthar par paTaḳh kar

har khilaune ko maiñ chaknā-chūr kar duuñ

sochtā huuñ

āsmāñ se chhīn kar

jalte hue sūraj kī thālī

ek kashtī kī tarah

gahre samundar meñ chalā.ūñ

aur us par saarī duniyā ko biThā kar

ġharq kar duuñ

sochtā huuñ

sochte hī sochte

maiñ ḳhud hī ik din

soch ke ātish-kada meñ jal na jā.ūñ

sochta hun

waqt ki gardan pakaD kar

reshmi scarf ka phanda laga kar

khinch lun

aur itni zor se chiKHun

zamin se

aasman tak

sirf meri chiKH hi ka shor gunje

waqt ki marti hui aawaz koi sun na pae

sochta hun

wusat-e-afaq mein parwaz kar ke

raat ki aankhon mein tariki ka parda Dal kar main

chand taron ko chura laun zamin par

aur thoDi der

bachchon ki tarah KHush ho ke khelun

khelne se bhi jab apna dil na bahle

ek patthar par paTaKH kar

har khilaune ko main chakna-chur kar dun

sochta hun

aasman se chhin kar

jalte hue suraj ki thaali

ek kashti ki tarah

gahre samundar mein chalaun

aur us par sari duniya ko biTha kar

gharq kar dun

sochta hun

sochte hi sochte

main KHud hi ek din

soch ke aatish-kada mein jal na jaun