taaqub mein

tumheñ bhī vo din hai yaad jis din

ga.e the ham tum

mohabbatoñ kī hasīn-o-pur-lutf vādiyoñ meñ

barā.e tafrīh

hasīn rastoñ pe chalte chalte

ik aisī manzil bhī aa ga.ī thī

nahīñ thā ham ko gumān jis kā

surāġh jis kā

'ajīb bastī thī vo bhī jānāñ

vo jis meñ insān hī ke jaise the log saare

magar vo insāñ nahīñ the shāyad

vo kaale kaale 'ajīb chehre

hamārī jānib hī dekhte the

nahīf-o-lāġhar the jism lekin

'ajīb āñkhoñ meñ ik chamak thī

jo pūchhtī thī

hamārī ḳhātir na phal na meve

na khetiyoñ meñ anaaj koī

hamārī tahzīb nai tamaddun muāshra na rivāj koī

ye sab to haq ne tumheñ diyā hai

magar tumheñ hai na qadr in kī

na in kī 'azmat kā kuchh pata hai

ye sun ke tum kuchh saham ga.ī thiiñ

tumhārā chehra Darā huā thā tumhārī āñkheñ phaTī huī thī

vahīñ pe tum ne kahā thā mujh se

kiyā thā sab ko hī rizq dene kā haq ne vā'da

kidhar hai āḳhir

dabī zabāñ se yahī to maiñ ne kahā thā tum se

chalo ki ab ham chaleñ yahāñ se

ye sun ke un meñ se ek bachcha hamārī jānib lapak paḌā thā

vo kaalā kaalā 'ajīb bachcha

nahīf-o-lāġhar ġharīb bachcha

maiñ sochtā huuñ

jo rizq dene kā vā'da rab ne kiyā thā sab se

vo rizq us kā hamārī jeboñ meñ to nahīñ thā

vo jis ko paane kī justujū meñ

vo kaalā kaalā 'ajīb bachcha

mire ta'āqub meñ chal rahā thā

tumhein bhi wo din hai yaad jis din

gae the hum tum

mohabbaton ki hasin-o-pur-lutf wadiyon mein

barae tafrih

hasin raston pe chalte chalte

ek aisi manzil bhi aa gai thi

nahin tha hum ko guman jis ka

suragh jis ka

'ajib basti thi wo bhi jaanan

wo jis mein insan hi ke jaise the log sare

magar wo insan nahin the shayad

wo kale kale 'ajib chehre

hamari jaanib hi dekhte the

nahif-o-laghar the jism lekin

'ajib aankhon mein ek chamak thi

jo puchhti thi

hamari KHatir na phal na mewe

na khetiyon mein anaj koi

hamari tahzib nai tamaddun muashra na riwaj koi

ye sab to haq ne tumhein diya hai

magar tumhein hai na qadr in ki

na in ki 'azmat ka kuchh pata hai

ye sun ke tum kuchh saham gai thin

tumhaara chehra Dara hua tha tumhaari aankhen phaTi hui thi

wahin pe tum ne kaha tha mujh se

kiya tha sab ko hi rizq dene ka haq ne wa'da

kidhar hai aaKHir

dabi zaban se yahi to main ne kaha tha tum se

chalo ki ab hum chalen yahan se

ye sun ke un mein se ek bachcha hamari jaanib lapak paDa tha

wo kala kala 'ajib bachcha

nahif-o-laghar gharib bachcha

main sochta hun

jo rizq dene ka wa'da rab ne kiya tha sab se

wo rizq us ka hamari jebon mein to nahin tha

wo jis ko pane ki justuju mein

wo kala kala 'ajib bachcha

mere ta'aqub mein chal raha tha