taaqub

ye āvāz usī tarah pīchhā karegī

zamīñ se fazā tak fazā se ḳhalā tak

tamannāoñ kī jāgtī dāstāneñ bikherā karegī

ye āvāz tārīḳh kī be-riyā vādiyoñ se

nikaltī huī marhala marhala

vaqt kā pīchhā kartī chalī aa.ī hai

ḳhanda-sāmāñ guzartī chalī aa.ī hai

ye āvāz bad-ḳhū chaTānoñ se tarshe darīchoñ ko

ik ajnabī rāh-rau kī tarah

thapthapāyā karegī

jilau meñ liye sub.h kī nik.hatoñ ke sharar

ḳhvāb-ālūda zehnoñ se khelā karegī

chhupā.e kaleje meñ ThanDī chitāeñ

ye shikva karegī

ki dhartī kī phailī huī god meñ

niiñd jaadū kī mānind paivast hai

ye āvāz har-gām par be-niyāzāna

idrāk ke qāfile ko pukārā karegī

ki sadiyoñ kī ḳhvābīdgī kī ridā

aadmī apne chehre se sarkā sake

aañkh khole zabāñ kaam meñ lā sake

ye aawaz usi tarah pichha karegi

zamin se faza tak faza se KHala tak

tamannaon ki jagti dastanen bikhera karegi

ye aawaz tariKH ki be-riya wadiyon se

nikalti hui marhala marhala

waqt ka pichha karti chali aai hai

KHanda-saman guzarti chali aai hai

ye aawaz bad-KHu chaTanon se tarshe darichon ko

ek ajnabi rah-rau ki tarah

thapthapaya karegi

jilau mein liye subh ki nikhaton ke sharar

KHwab-aluda zehnon se khela karegi

chhupae kaleje mein ThanDi chitaen

ye shikwa karegi

ki dharti ki phaili hui god mein

nind jadu ki manind paiwast hai

ye aawaz har-gam par be-niyazana

idrak ke qafile ko pukara karegi

ki sadiyon ki KHwabidgi ki rida

aadmi apne chehre se sarka sake

aankh khole zaban kaam mein la sake