talluq

ta.alluq kāñch kā bartan nahīñ

hāthoñ se chhūTe aur chaknā-chūr ho jaa.e

ta.alluq āhanī dīvār hotā hai

ta.alluq āsmānoñ par

chamaktā ik sitāra bhī nahīñ jo raat bhar chamke

magar jaise hī sūraj apnī kirnoñ ko

zamīñ par phailne kā hukm de to

vo kahīñ rū-posh ho jaa.e

ta.alluq āsmāñ hai

ta.alluq mausamoñ kā husn kab hai

jo sadā baaqī nahīñ rahtā

ta.alluq to havā hai

aur zamānat hai hamārī zindagī kī

ta.alluq ahd kab hai jo nibhātā hī nahīñ koī

hamesha TuuT jaatā hai

ta.alluq ishq hai

ehsās hai ḳhushbū hai jaadū hai

ta.alluq vaqt kī sūrat hamesha chaltā rahtā hai

ta.alluq saañs ke mānind hotā hai

ta.alluq toḌne vaalo tumheñ mālūm hai

sachchā ta.alluq ḳhatm ho saktā hai

lekin mar nahīñ saktā

talluq kanch ka bartan nahin

hathon se chhuTe aur chakna-chur ho jae

talluq aahani diwar hota hai

talluq aasmanon par

chamakta ek sitara bhi nahin jo raat bhar chamke

magar jaise hi suraj apni kirnon ko

zamin par phailne ka hukm de to

wo kahin ru-posh ho jae

talluq aasman hai

talluq mausamon ka husn kab hai

jo sada baqi nahin rahta

talluq to hawa hai

aur zamanat hai hamari zindagi ki

talluq ahd kab hai jo nibhata hi nahin koi

hamesha TuT jata hai

talluq ishq hai

ehsas hai KHushbu hai jadu hai

talluq waqt ki surat hamesha chalta rahta hai

talluq sans ke manind hota hai

talluq toDne walo tumhein malum hai

sachcha talluq KHatm ho sakta hai

lekin mar nahin sakta