tare

zarā nanhe taare mire paas aa jā

tū apnī chamak aa ke mujh ko dikhā jā

idhar aa tujhe haath meñ le ke dekhūñ

ye kyā baat hai tū chamaktā jo hai yuuñ

tū nanhā sā jugnū hai allāh miyāñ kā

tujhe apnī Topī meñ rakh luuñ idhar aa

mirī Topī meñ aa ke jham jham chamaknā

mire sar pe tū raat ko aa ke hañsnā

chamakte ho hañste ho tum itne ūñche

mirā haath pahuñche vahāñ kis tarah se

zamīñ par huuñ maiñ aur tum āsmāñ par

batāo to phir maiñ tumheñ pā.ūñ kyoñ kar

chalā aa chalā aa mire pyāre taare

charāġhoñ se achchhe khilaunoñ se pyāre

taare kā javāb

bulāo na mujh ko tum ai bhole bachche

maiñ kyuuñ kar chalā aa.uuñ apnī jagah se

ḳhudā ne mujhe āsmāñ meñ jaḌā hai

yahīñ us ne rahne ko mujh se kahā hai

bahut duur ho mujh se ai pyāre bachche

pahuñch sakte ho tum mire paas kaise

ḳhudā ne chamak mujh meñ jis tarah dī hai

kitāboñ meñ vo pyāre likkhī hui hai

baḌe ho ke jab tum paḌhoge kitābeñ

samajh meñ phir aa jā.eñgī saarī bāteñ

sitāra huuñ jugnū nahīñ huuñ maiñ pyāre

jo jugnū haiñ vo baaġh meñ haiñ tumhāre

maiñ go tum ko chhoTā nazar aa rahā huuñ

magar saarī duniyā se bhī kuchh baḌā huuñ

maiñ chhoTī sī Topī meñ kis tarah aa.uuñ

chamak kis tarah tum ko apnī dikhā.ūñ

mujhe duur se dekh ke ho lo ḳhush tum

lo ā.eñge kal shaam jaate haiñ ab ham

zara nanhe tare mere pas aa ja

tu apni chamak aa ke mujh ko dikha ja

idhar aa tujhe hath mein le ke dekhun

ye kya baat hai tu chamakta jo hai yun

tu nanha sa jugnu hai allah miyan ka

tujhe apni Topi mein rakh lun idhar aa

meri Topi mein aa ke jham jham chamakna

mere sar pe tu raat ko aa ke hansna

chamakte ho hanste ho tum itne unche

mera hath pahunche wahan kis tarah se

zamin par hun main aur tum aasman par

batao to phir main tumhein paun kyon kar

chala aa chala aa mere pyare tare

charaghon se achchhe khilaunon se pyare

tare ka jawab

bulao na mujh ko tum ai bhole bachche

main kyun kar chala aaun apni jagah se

KHuda ne mujhe aasman mein jaDa hai

yahin us ne rahne ko mujh se kaha hai

bahut dur ho mujh se ai pyare bachche

pahunch sakte ho tum mere pas kaise

KHuda ne chamak mujh mein jis tarah di hai

kitabon mein wo pyare likkhi hui hai

baDe ho ke jab tum paDhoge kitaben

samajh mein phir aa jaengi sari baaten

sitara hun jugnu nahin hun main pyare

jo jugnu hain wo bagh mein hain tumhaare

main go tum ko chhoTa nazar aa raha hun

magar sari duniya se bhi kuchh baDa hun

main chhoTi si Topi mein kis tarah aaun

chamak kis tarah tum ko apni dikhaun

mujhe dur se dekh ke ho lo KHush tum

lo aaenge kal sham jate hain ab hum