tariKH hamein sath liye jati hai

tārīḳh hameñ saath liye jaatī hai goyā

raste meñ taḳhayyul ke

ka.ī shahr haiñ ābād maazī ke

ka.ī gaañv jo raushan haiñ

guftugū se hamārī

haiñ dasht ka.ī duur talak

jin ko sajāyā hai kabhī ham ne

hañsī-khel meñ

ḳhvāboñ ke ugā kar shajar

jazbāt ke chashme haiñ umaḌte hue

jharne haiñ fikr-mandiyoñ ke jharte hue

dil meñ hamāre

ki jaise ek-dūsre ko bachānā ho hameñ

gardish-e-hālāt se

bhīge hue ehsās se

denī ho tasallī

mushkil bharī rāhoñ meñ

ye rahguzar tamām

jo manzil kī taraf baḌhtī huī

lagtī haiñ gum-sum

jaise ki zindagī kabhī

maqsad se bichhaḌ jaa.e

jaise ki tasavvur se

koī mudda.ā chhin jaa.e zarūrī

jaise ki taqāzoñ kā sila

kuchh na mile ishq meñ

ma.ashūq kī jānib se tā-umr dīvāne ko

ham phir bhī chale jaate haiñ

ik tārīḳh kī tasvīr banāte hue

ummīd ke pannoñ par

armān ke rañgoñ meñ Dubo.e hue

lafzoñ kī uñgliyāñ

jaise ki ye bhī kam nahīñ

hāsil kamāl

daur-e-safar kuchh nahīñ baaqī malāl

jabki hai hamrāh koī

ham-navā hamrāz safar meñ

ki jahāñ lafz haiñ apnī jagah

ḳhāmoshiyāñ bhī boltī jaatī haiñ duur tak

ġhamoñ kī raat meñ

ḳhushiyoñ ke jalātī diye

duniyā se bhī vābastagī kā lutf

mere dil meñ jagātī huī

rakhtī huī ehsās kī chaukhaT pe narm paañv

ham ḳhush haiñ bahut ab

ki ḳhushī kī talāsh meñ

jaanā na kisī raah

honā na kisī des

rahnā na kisī saath

tārīḳh hameñ saath liye jaatī hai goyā

tariKH hamein sath liye jati hai goya

raste mein taKHayyul ke

kai shahr hain aabaad mazi ke

kai ganw jo raushan hain

guftugu se hamari

hain dasht kai dur talak

jin ko sajaya hai kabhi hum ne

hansi-khel mein

KHwabon ke uga kar shajar

jazbaat ke chashme hain umaDte hue

jharne hain fikr-mandiyon ke jharte hue

dil mein hamare

ki jaise ek-dusre ko bachana ho hamein

gardish-e-haalat se

bhige hue ehsas se

deni ho tasalli

mushkil bhari rahon mein

ye rahguzar tamam

jo manzil ki taraf baDhti hui

lagti hain gum-sum

jaise ki zindagi kabhi

maqsad se bichhaD jae

jaise ki tasawwur se

koi muddaa chhin jae zaruri

jaise ki taqazon ka sila

kuchh na mile ishq mein

mashuq ki jaanib se ta-umr diwane ko

hum phir bhi chale jate hain

ek tariKH ki taswir banate hue

ummid ke pannon par

arman ke rangon mein Duboe hue

lafzon ki ungliyan

jaise ki ye bhi kam nahin

hasil kamal

daur-e-safar kuchh nahin baqi malal

jabki hai hamrah koi

ham-nawa hamraaz safar mein

ki jahan lafz hain apni jagah

KHamoshiyan bhi bolti jati hain dur tak

ghamon ki raat mein

KHushiyon ke jalati diye

duniya se bhi wabastagi ka lutf

mere dil mein jagati hui

rakhti hui ehsas ki chaukhaT pe narm panw

hum KHush hain bahut ab

ki KHushi ki talash mein

jaana na kisi rah

hona na kisi des

rahna na kisi sath

tariKH hamein sath liye jati hai goya