tabassum

chamak hiire se baḌh kar ai tabassum tujh meñ pinhāñ hai

unhīñ hoñToñ pe zau bikhrā tū jin hoñToñ ko shāyāñ hai

misāl-e-barq tū girtā hai jān-e-nā-shakebā par

girī thī jis tarah bijlī kalīm-e-tūr-e-sīnā par

na hogā la.al koī terī qīmat kā badaḳhshāñ meñ

tū hī ik misra-e-barjasta hai qudrat ke dīvāñ meñ

jahāñ kī daulatoñ meñ koī bhī daulat nahīñ aisī

falak par kab chamaktī hai sitāroñ kī jabīñ aisī

ġham-e-duniyā kā shākī jab huā haq se dil-e-ādam

tujhe de kar atā farmā diyā har zaḳhm kā marham

huā jaatā hai pazhmurda dil-e-āvāra siine meñ

to Tapkā qatra-e-āb-e-baqā is ābgīne meñ

jhalak pal-bhar kī hai lekin asar hai dā.imī terā

sar-e-gulzār dam bhartī hai goyā har kalī terā

lab-e-jāñ-baḳhsh par kuchh kuchh numāyāñ ho ke rah jā phir

adhūrī rah ga.ī hai dāstān-e-ishq kah jā phir

chamak hire se baDh kar ai tabassum tujh mein pinhan hai

unhin honTon pe zau bikhra tu jin honTon ko shayan hai

misal-e-barq tu girta hai jaan-e-na-shakeba par

giri thi jis tarah bijli kalim-e-tur-e-sina par

na hoga lal koi teri qimat ka badaKHshan mein

tu hi ek misra-e-barjasta hai qudrat ke diwan mein

jahan ki daulaton mein koi bhi daulat nahin aisi

falak par kab chamakti hai sitaron ki jabin aisi

gham-e-duniya ka shaki jab hua haq se dil-e-adam

tujhe de kar ata farma diya har zaKHm ka marham

hua jata hai pazhmurda dil-e-awara sine mein

to Tapka qatra-e-ab-e-baqa is aabgine mein

jhalak pal-bhar ki hai lekin asar hai daimi tera

sar-e-gulzar dam bharti hai goya har kali tera

lab-e-jaan-baKHsh par kuchh kuchh numayan ho ke rah ja phir

adhuri rah gai hai dastan-e-ishq kah ja phir