tabib-e-azam

jo zaḳhm maiñ ne tujhe diye haiñ

jo zaḳhm tū ne mire ḳhayāloñ ke in

gudāz a.azā pe diye haiñ

vo ab fazā meñ bikhar ga.e haiñ

hamāre jismoñ kī qaid se vo

nikal ga.e haiñ

bikhar ga.e haiñ har ek shai meñ

havā meñ peḌoñ meñ bādaloñ meñ

vo koh-o-dariyā kī chuppi.on

aur shor-o-ġhul meñ utar ga.e haiñ

jidhar bhī dekhūñ

vo zaḳhm chupke chupke

ris rahe haiñ

jo baaġh meñ ik kalī ko chhū luuñ

to uñgliyoñ pe mavād sā kuchh

dikhā.ī de de

jo bādaloñ se Tapke paanī

to buuñd meñ saḌ rahe lahū kī

mahak sī aa.e

kabhī jo ghabrā ke koī

kitāb uThā luuñ

to us ke pannoñ pe

paTTiyoñ kā gumāñ ho jo ki

abhī utārī ga.ī huuñ

kisī ke zaḳhm-ḳhurda badan se

sunā hai ham ne

ki vaqt to ek chāra-gar hai

aur us kī zambīl meñ

kitne nusḳhe

kahāñ na jaane vo gum huā hai

ki lamhe lamhe meñ kis jatan se

DhūñDhtā huuñ

kahāniyoñ meñ hai zikr jis kā

vo terā merā vaqt jo hai

tabīb-e-āzam

jo zaKHm main ne tujhe diye hain

jo zaKHm tu ne mere KHayalon ke in

gudaz aaza pe diye hain

wo ab faza mein bikhar gae hain

hamare jismon ki qaid se wo

nikal gae hain

bikhar gae hain har ek shai mein

hawa mein peDon mein baadalon mein

wo koh-o-dariya ki chuppion

aur shor-o-ghul mein utar gae hain

jidhar bhi dekhun

wo zaKHm chupke chupke

ris rahe hain

jo bagh mein ek kali ko chhu lun

to ungliyon pe mawad sa kuchh

dikhai de de

jo baadalon se Tapke pani

to bund mein saD rahe lahu ki

mahak si aae

kabhi jo ghabra ke koi

kitab uTha lun

to us ke pannon pe

paTTiyon ka guman ho jo ki

abhi utari gai hun

kisi ke zaKHm-KHurda badan se

suna hai hum ne

ki waqt to ek chaara-gar hai

aur us ki zambil mein

kitne nusKHe

kahan na jaane wo gum hua hai

ki lamhe lamhe mein kis jatan se

DhunDhta hun

kahaniyon mein hai zikr jis ka

wo tera mera waqt jo hai

tabib-e-azam