tafsir-e-hayat

duur se bhāgte aur baḌhte chale aate haiñ

jazba-e-shauq meñ Duube hue sarsabz daraḳht

rāhat-e-rūh kā sāmān liye

naġhma-e-sāz nazar bikhrāte

merī mushtāq nigāhoñ se milāte hue nazreñ apnī

mujh se mil mil ke bichhaḌ jaate haiñ

aur phir duur bahut duur pahuñch kar aise

dekhte jaate haiñ muḌ muḌ ke mujhe

jaise ik tishnagī mahsūs kiye jaate haiñ

rail is kaif-o-nazar se aarī

apnī manzil ko uḌī jaatī hai

aur sarsabz daraḳht

dhuñdle sāyoñ meñ badalte hue mādūm hue jaate haiñ

jaise maiñ ne unheñ dekhā hī na ho

yūñhī sāyoñ meñ jhalakte hue mahbūb jamāl

saf.ha-e-dahr ke tābinda nuqūsh

chand yādoñ meñ Dhale jaate haiñ

ye zamāne kā chalan aur safar

mere ahbāb mujhe dekh rahe haiñ goyā

maiñ banā jaatā huuñ tafsīr-e-hayāt

dur se bhagte aur baDhte chale aate hain

jazba-e-shauq mein Dube hue sarsabz daraKHt

rahat-e-ruh ka saman liye

naghma-e-saz nazar bikhraate

meri mushtaq nigahon se milate hue nazren apni

mujh se mil mil ke bichhaD jate hain

aur phir dur bahut dur pahunch kar aise

dekhte jate hain muD muD ke mujhe

jaise ek tishnagi mahsus kiye jate hain

rail is kaif-o-nazar se aari

apni manzil ko uDi jati hai

aur sarsabz daraKHt

dhundle sayon mein badalte hue madum hue jate hain

jaise main ne unhen dekha hi na ho

yunhi sayon mein jhalakte hue mahbub jamal

safha-e-dahr ke tabinda nuqush

chand yaadon mein Dhale jate hain

ye zamane ka chalan aur safar

mere ahbab mujhe dekh rahe hain goya

main bana jata hun tafsir-e-hayat