taghayyur

muddatoñ baad achānak tumheñ dekhā jo kahīñ

tum meñ tum sā kahīñ kuchh bhī nazar aayā hī nahīñ

na vo chehrā na tabassum na vo bholī āñkheñ

zindagī jin kī tamannā meñ guzārī maiñ ne

na vo lahja na takallum na vo apnī sī mahak

jis kī ḳhushbū mirī sāñsoñ meñ samā jaatī thī

der tak maiñ ne kahīñ tum meñ hī khojā tum ko

tum ko paayā hī nahīñ tum to kahīñ the hī nahīñ

jo mukammal kabhī merā thā faqat merā thā

aaj us shaḳhs kā tum meñ koī TukḌā bhī nahīñ

ye sarāpā jo koī ajnabī dikhtā hai mujhe

us meñ guzre hue ehsās kā resha bhī nahīñ

barsoñ pahle kisī shā.ir ne kahā thā shāyad

dil badaltā hai to insāñ bhī badal jaate haiñ

muddaton baad achanak tumhein dekha jo kahin

tum mein tum sa kahin kuchh bhi nazar aaya hi nahin

na wo chehra na tabassum na wo bholi aankhen

zindagi jin ki tamanna mein guzari main ne

na wo lahja na takallum na wo apni si mahak

jis ki KHushbu meri sanson mein sama jati thi

der tak main ne kahin tum mein hi khoja tum ko

tum ko paya hi nahin tum to kahin the hi nahin

jo mukammal kabhi mera tha faqat mera tha

aaj us shaKHs ka tum mein koi TukDa bhi nahin

ye sarapa jo koi ajnabi dikhta hai mujhe

us mein guzre hue ehsas ka resha bhi nahin

barson pahle kisi shair ne kaha tha shayad

dil badalta hai to insan bhi badal jate hain