taghayyuraat

hañs hañs ke chheḌne kī vo aadat nahīñ rahī

vo maiñ nahīñ rahā vo masarrat nahīñ rahī

merā shu.ūr ḳhud hī mirā pāsbān hai

ab manzil-e-hayāt mire darmiyān hai

tere liye vo vahshat-e-hosh-āzmā ga.ī

vo arz sub.h-o-shām kī vo iltijā ga.ī

be-bākiyoñ kā terī vo dilkash fusūñ gayā

vo dil bujhā vo shauq miTā vo junūñ gayā

aglī mohabbatoñ kī vo tahrīr miT ga.ī

nādāniyoñ ke daur kī tasvīr miT ga.ī

maddham sā paḌ gayā hai kuchh ab sāz-e-dostī

jab se khulā hai mujh pe tirā rāz-e-dostī

vo valvale jo dil meñ the ḳhāmosh ho ga.e

ik sānehe se mere bajā hosh ho ga.e

jo raaz thī nibāh kā vo baat bhī ga.ī

vāraftagī-e-shauq-e-mulāqāt bhī ga.ī

ab to qadīm vaz.a kā ik paas hai mujhe

derīna dostī kā kuchh ehsās hai mujhe

kuchh ye nahīñ ki dard-e-nihāñ duur ho gayā

maiñ gardish-e-zamāna se majbūr ho gayā

uḌtā huā sā rang ruḳh-e-rozgār hai

ya.anī taġhayyurāt pe kyā iḳhtiyār hai

hans hans ke chheDne ki wo aadat nahin rahi

wo main nahin raha wo masarrat nahin rahi

mera shuur KHud hi mera pasban hai

ab manzil-e-hayat mere darmiyan hai

tere liye wo wahshat-e-hosh-azma gai

wo arz subh-o-sham ki wo iltija gai

be-bakiyon ka teri wo dilkash fusun gaya

wo dil bujha wo shauq miTa wo junun gaya

agli mohabbaton ki wo tahrir miT gai

nadaniyon ke daur ki taswir miT gai

maddham sa paD gaya hai kuchh ab saz-e-dosti

jab se khula hai mujh pe tera raaz-e-dosti

wo walwale jo dil mein the KHamosh ho gae

ek sanehe se mere baja hosh ho gae

jo raaz thi nibah ka wo baat bhi gai

waraftagi-e-shauq-e-mulaqat bhi gai

ab to qadim waza ka ek pas hai mujhe

derina dosti ka kuchh ehsas hai mujhe

kuchh ye nahin ki dard-e-nihan dur ho gaya

main gardish-e-zamana se majbur ho gaya

uDta hua sa rang ruKH-e-rozgar hai

yani taghayyuraat pe kya iKHtiyar hai