tajdid-3

tum ek hī libās nahīñ pahan sakte

aur vo hai safar

27-sāl se is arsa-e-be-zamīnī par

maiñ safar hī to pahantā aayā huuñ

ek baar ek qasbe meñ

ek nannhī sī bachchī ne mujh se

merī udāsī pūchhī thī

merī udāsī mere andar thī

aur bachchī kā matlab bāhar thā

bāhar kī quvvat ne merī chhipī huī roTiyāñ chhīn liiñ

tum ne kahīñ se sun liyā

ki jo miTTī gosht se chipak jaatī hai

us se ek aTal makān bantā hai

so tum aTal makān meñ aTal ban ga.e

tum ne mujh se merī shahriyat chhīn lī

kyūñki

maiñ un logoñ meñ se nahīñ thā

jinhoñ ne mahz auratoñ ke naam

sūñghne meñ ka.ī baras guzār diye

phir shāyad unheñ koī chor-darvāza mil gayā

kuchh log jo jail se chhūT ke aa.e the

unhoñ ne apne gharoñ kī salāḳhoñ ko

niile rañg se rañg diyā

kyūñki niile rañg kī niiñd

ārām aur vahm ke darmiyān

shāyad ek Taañk hotī hai

maiñ ne kabhī tonic nahīñ piyā

mere paas to kuchh jam.a huī roTiyāñ thiiñ

unhīñ meñ kahīñ khāne baiThā thā

ki shahroñ ke chaurāhoñ kī samt

jaatī huī dhuup bahut tez hogī

ek mulk kā dhuāñ

dūsre mulk kī fasloñ meñ sarāyat kar gayā

tum nahīñ jānte ki ye sab kuchh kyuuñ huā

tum apne makān meñ aTal rahe

maiñ aage chal diyā

mujhe chor-darvāza nahīñ milā

tum ek hi libas nahin pahan sakte

aur wo hai safar

27-sal se is arsa-e-be-zamini par

main safar hi to pahanta aaya hun

ek bar ek qasbe mein

ek nannhi si bachchi ne mujh se

meri udasi puchhi thi

meri udasi mere andar thi

aur bachchi ka matlab bahar tha

bahar ki quwwat ne meri chhipi hui roTiyan chhin lin

tum ne kahin se sun liya

ki jo miTTi gosht se chipak jati hai

us se ek aTal makan banta hai

so tum aTal makan mein aTal ban gae

tum ne mujh se meri shahriyat chhin li

kyunki

main un logon mein se nahin tha

jinhon ne mahz auraton ke nam

sunghne mein kai baras guzar diye

phir shayad unhen koi chor-darwaza mil gaya

kuchh log jo jail se chhuT ke aae the

unhon ne apne gharon ki salaKHon ko

nile rang se rang diya

kyunki nile rang ki nind

aaram aur wahm ke darmiyan

shayad ek Tank hoti hai

main ne kabhi tonic nahin piya

mere pas to kuchh jama hui roTiyan thin

unhin mein kahin khane baiTha tha

ki shahron ke chaurahon ki samt

jati hui dhup bahut tez hogi

ek mulk ka dhuan

dusre mulk ki faslon mein sarayat kar gaya

tum nahin jaante ki ye sab kuchh kyun hua

tum apne makan mein aTal rahe

main aage chal diya

mujhe chor-darwaza nahin mila