tajdid-e-wafa

tū pareshāñ na ho maiñ aaj bhī terī ḳhātir

apnī tanhā.ī ko siine se lagā.e huuñ abhī

terī ulfat kī sunahrī sī vo raushan qindīl

haañ tire ġham ke añdheroñ meñ jalā.e huuñ abhī

tū pareshāñ na ho gar mujh se muḳhātib hai koī

maiñ tujhe pyaar kā maqsūm batā saktā huuñ

merī tanhā.ī ke miT jaane kā ḳhadsha mat kar

apnī tanhā.ī kā mafhūm batā saktā huuñ

tū ne dikhlā.e the mujh ko jo hasīñ taaj mahal

maiñ unheñ sarhad-e-idrāk pe toḌ aaya huuñ

tū merī samt na dekh ai mere kho.e sapne

maiñ umīdoñ ke sanam puuj ke toḌ aaya huuñ

tere sapne to tire saath haiñ phir bhī tujh ko

kyoñ pareshān se sapne mire yaad aate haiñ

ab tujhe mujh se koī rabt koī zabt nahīñ

phir mirī samt kyoñ āñchal tire lahrāte haiñ

ab tire saath jo sapne haiñ haqīqat hai vahī

ye duā hai ki tire ḳhvāb na ab TuuT sakeñ

ab tire saath uThe haiñ jo kisī ke ye qadam

ye kisī gaam pe tujh se na kabhī chhūT sakeñ

ab mire paas na kaliyāñ haiñ na phūloñ kī bahār

ab mirī chashm-e-tasavvur meñ nahīñ koī hasīñ

tū mujhe bhuul bhī jā ab ki mire sapnoñ meñ

sirf tanhā.ī hai ab koī nahīñ koī nahīñ

tu pareshan na ho main aaj bhi teri KHatir

apni tanhai ko sine se lagae hun abhi

teri ulfat ki sunahri si wo raushan qindil

han tere gham ke andheron mein jalae hun abhi

tu pareshan na ho gar mujh se muKHatib hai koi

main tujhe pyar ka maqsum bata sakta hun

meri tanhai ke miT jaane ka KHadsha mat kar

apni tanhai ka mafhum bata sakta hun

tu ne dikhlae the mujh ko jo hasin taj mahal

main unhen sarhad-e-idrak pe toD aaya hun

tu meri samt na dekh ai mere khoe sapne

main umidon ke sanam puj ke toD aaya hun

tere sapne to tere sath hain phir bhi tujh ko

kyon pareshan se sapne mere yaad aate hain

ab tujhe mujh se koi rabt koi zabt nahin

phir meri samt kyon aanchal tere lahraate hain

ab tere sath jo sapne hain haqiqat hai wahi

ye dua hai ki tere KHwab na ab TuT saken

ab tere sath uThe hain jo kisi ke ye qadam

ye kisi gam pe tujh se na kabhi chhuT saken

ab mere pas na kaliyan hain na phulon ki bahaar

ab meri chashm-e-tasawwur mein nahin koi hasin

tu mujhe bhul bhi ja ab ki mere sapnon mein

sirf tanhai hai ab koi nahin koi nahin