taKHliq

sar-sabzī mastī shādābī jhoñkoñ kā maddham sañgīt

hare-bhare khetoñ meñ nanhe mane paudoñ kī sarsar

miTTī ke zarḳhez badan kī soñdhī soñdhī sī ḳhushbū

rū-pahlī chamkīlī dhuup kī pyārī pyārī sī lazzat

peḌoñ ke ThanDe sāyoñ meñ shafqat kī halkī sī aañch

pagDanDī ke moḌ pe lahrāte āñchal kī rañgīnī

jismoñ meñ quvvat kī maujeñ āñkhoñ meñ bharpūr chamak

hañste khelte nanhe bachche añg añg meñ tarrārī

zarḳhez-o-shādāb zamīñ par hastī yuuñ lahrātī hai

jaise ik ma.asūm sī bachchī guḌiyā le kar naach uThe

siine bāheñ zulfeñ hoñT javāñ jismoñ kī lahrāhaT

raqs-o-naġhma jām-o-mīnā saaqī kī āñkhoñ kī thakan

mahl-o-aivāñ garmī-e-lazzat ḳhvāboñ kā masrūr jahāñ

masjid ke ūñche mīnāre mandir kā sone kā kalas

shor-o-ġhauġhā hañgāme afsāne jaise marne ke

mahkūmī kulfat shorish zaḳhmoñ kī bauchhāreñ har-sū

jañg qaht bīmārī hasrat jiine vāloñ kī daulat

rañg rañg ke parcham zulm-o-tashaddud ke saare sāmāñ

jiine vāloñ kī duniyā har lamha rañg badaltī hai

ḳhasta imkānāt kī kaḌiyāñ TuuT ke girtī haiñ

ābādī aur vīrāna mafhūm badalte rahte haiñ

dukhtī rotī dhartī par hastī shor machātī hai

jaise ik nannhī bachchī shafqat kī bhūkī chīḳh uThe

aaj magar siine meñ ye ehsās dhaḌaktā hai paiham

maiñ us daur kā insāñ huuñ jis meñ saare insānoñ ne

apne jīte-jāgte azm amn-o-sukūñ kī quvvat se

ek na.e imkān kī sham.a raushan kī hai dhartī par

ek na.ī manzil kī jānib apne qadam baḌhā.e haiñ

quvvat mehnat aur masarrat ke raste apnā.e haiñ

ehsāsāt kī tasvīreñ ye saa.e dauḌte lamhoñ ke

dhartī kī taḳhlīq haiñ is kī god meñ phalte-phūlte haiñ

sar-sabzi masti shadabi jhonkon ka maddham sangit

hare-bhare kheton mein nanhe mane paudon ki sarsar

miTTi ke zarKHez badan ki sondhi sondhi si KHushbu

ru-pahli chamkili dhup ki pyari pyari si lazzat

peDon ke ThanDe sayon mein shafqat ki halki si aanch

pagDanDi ke moD pe lahraate aanchal ki rangini

jismon mein quwwat ki maujen aankhon mein bharpur chamak

hanste khelte nanhe bachche ang ang mein tarrari

zarKHez-o-shadab zamin par hasti yun lahraati hai

jaise ek masum si bachchi guDiya le kar nach uThe

sine bahen zulfen honT jawan jismon ki lahrahaT

raqs-o-naghma jam-o-mina saqi ki aankhon ki thakan

mahl-o-aiwan garmi-e-lazzat KHwabon ka masrur jahan

masjid ke unche minare mandir ka sone ka kalas

shor-o-ghaugha hangame afsane jaise marne ke

mahkumi kulfat shorish zaKHmon ki bauchhaaren har-su

jang qaht bimari hasrat jine walon ki daulat

rang rang ke parcham zulm-o-tashaddud ke sare saman

jine walon ki duniya har lamha rang badalti hai

KHasta imkanat ki kaDiyan TuT ke girti hain

aabaadi aur virana mafhum badalte rahte hain

dukhti roti dharti par hasti shor machati hai

jaise ek nannhi bachchi shafqat ki bhuki chiKH uThe

aaj magar sine mein ye ehsas dhaDakta hai paiham

main us daur ka insan hun jis mein sare insanon ne

apne jite-jagte azm amn-o-sukun ki quwwat se

ek nae imkan ki shama raushan ki hai dharti par

ek nai manzil ki jaanib apne qadam baDhae hain

quwwat mehnat aur masarrat ke raste apnae hain

ehsasat ki taswiren ye sae dauDte lamhon ke

dharti ki taKHliq hain is ki god mein phalte-phulte hain