talab ki sabz miTi

sāvan kī sunahrī jhaḌī ke

mutarannim qatroñ kā raqs kuchh talāshtā hai

havāoñ kā ruḳh

tirī jānib moḌne ko

āsmān kī vus.atoñ se guftugū jaarī hai

safed kabūtar

paiġhām-rasānī kī pahlī uḌaan bharne ke muntazir haiñ

is muskurāhaT kā sadqa utārne ko

dhanak nā-kāfī hai

jo mujh tak tasvīr se nikal kar pahuñchī

maiñ ik nayā rang taḳhlīq karūñgī

tirī āvāz kā zā.iqa

mirī ḳhizāñ meñ Duubī samā.atoñ kī

udaas Tahniyoñ pe rangīñ pattoñ kī madhur

dhun kā mūjib Thahrā

tire lahje kī barastī phuvār

mire sin-rasīda vajūd kī

bahāroñ kī tavīl-umrī kā sabab hai

maiñ tere an-kahe ash.ār kī

pahlī sāme.a

agar apnī tamām nazmeñ

tujh pe vaar duuñ

to maan jāoge

talab kī miTTī kā rang

tab.ī taur par sabz hotā hai

sawan ki sunahri jhaDi ke

mutarannim qatron ka raqs kuchh talashta hai

hawaon ka ruKH

teri jaanib moDne ko

aasman ki wusaton se guftugu jari hai

safed kabutar

paigham-rasani ki pahli uDan bharne ke muntazir hain

is muskurahaT ka sadqa utarne ko

dhanak na-kafi hai

jo mujh tak taswir se nikal kar pahunchi

main ek naya rang taKHliq karungi

teri aawaz ka zaiqa

meri KHizan mein Dubi samaaton ki

udas Tahniyon pe rangin patton ki madhur

dhun ka mujib Thahra

tere lahje ki barasti phuwar

mere sin-rasida wajud ki

bahaaron ki tawil-umri ka sabab hai

main tere an-kahe ashaar ki

pahli samea

agar apni tamam nazmen

tujh pe war dun

to man jaoge

talab ki miTTi ka rang

tabi taur par sabz hota hai