tamanna sar-ba-zanu

mujhe kyā diyā hai zindagī ne kis ko batlā.ūñ

mirī āñkhoñ meñ kuchh aañsū mire hoñToñ pe kuchh aaheñ

mirī kanpaTTiyoñ par tajraboñ kī kuchh safedī hai

mirī ainak ke ‘adse merī bīnā.ī pe hañste haiñ

magar is 'umr meñ bhī merī nādānī nahīñ jaatī

bahāne qurbatoñ ke mujh ko jab bhī yaad aate haiñ

to apne aap ko ilzām un kī laag kā de kar

maiñ har vābastagī ko ḳhud-farebī kah ke hañstā huuñ

ye merī sādgī dekho ki ummīd ab bhī hai lekin

koī 'ahd-e-vafā kī jur.at-e-iz.hār kyā māñge

tamannā sar-ba-zānū apne vā'doñ par pashemāñ hai

mujhe kya diya hai zindagi ne kis ko batlaun

meri aankhon mein kuchh aansu mere honTon pe kuchh aahen

meri kanpaTTiyon par tajrabon ki kuchh safedi hai

meri ainak ke ‘adse meri binai pe hanste hain

magar is 'umr mein bhi meri nadani nahin jati

bahane qurbaton ke mujh ko jab bhi yaad aate hain

to apne aap ko ilzam un ki lag ka de kar

main har wabastagi ko KHud-farebi kah ke hansta hun

ye meri sadgi dekho ki ummid ab bhi hai lekin

koi 'ahd-e-wafa ki jurat-e-izhaar kya mange

tamanna sar-ba-zanu apne wa'don par pasheman hai