tambih

dosto mere himāla kī taraf mat aanā

varna barf aag ke sho'loñ meñ badal jā.egī

shāḳh-e-gul zahr kī shamshīr meñ Dhal jā.egī

mere phūloñ ke shivāle kī taraf mat aanā

shiddat-e-nūr se bhī varna pighal jāoge

mere mandir meñ qadam rakhte hī jal jāoge

merī gambhīr sī ye sham’-e-tarab mat chhūnā

varna patthar meñ bhī poshīda sharar hote haiñ

devtāoñ hī meñ shankar bhī magar hote haiñ

mere ādarsh kī narmī se na tum Takrānā

varna ādarsh meñ tāqat bhī huā kartī hai

dil-e-ulfat hī meñ nafrat bhī huā kartī hai

tum tashaddud ke irāde se idhar mat aanā

varna gautam kī zamīñ aag bhī ban saktī hai

sham'-e-pākīza kī lau naag bhī ban saktī hai

dosto mere himala ki taraf mat aana

warna barf aag ke sho'lon mein badal jaegi

shaKH-e-gul zahr ki shamshir mein Dhal jaegi

mere phulon ke shiwale ki taraf mat aana

shiddat-e-nur se bhi warna pighal jaoge

mere mandir mein qadam rakhte hi jal jaoge

meri gambhir si ye sham’-e-tarab mat chhuna

warna patthar mein bhi poshida sharar hote hain

dewtaon hi mein shankar bhi magar hote hain

mere aadarsh ki narmi se na tum Takrana

warna aadarsh mein taqat bhi hua karti hai

dil-e-ulfat hi mein nafrat bhi hua karti hai

tum tashaddud ke irade se idhar mat aana

warna gautam ki zamin aag bhi ban sakti hai

sham'-e-pakiza ki lau nag bhi ban sakti hai