tanhai

apnī tanhā.ī mujhe achchhī lagī

maiñ ne chāhā hai use

aur paayā bhī use

apne roz-o-shab meñ aksar hai basāyā bhī use

usī ne dī haiñ mujh ko aisī ḳhalvateñ

jin meñ rah kar

maiñ kabhī tanhā nahīñ

saath mere anginat aise ehsāsāt haiñ

jin se hāsil hai

mirī tanhā.iyoñ ko ik sukūñ

ik rifāqat

ġham-gusārī

rahnumā.ī

rahbarī

pā ke maiñ ehsās ke is qurb ko

rah ke tanhā bhī nahīñ tanhā rahī

merī tanhā.ī mirī hamdam mirī dam-sāz hai

us ke ḳhāl-o-ḳhat se maiñ achchhī tarah vāqif nahīñ

naam bhī maḳhsūs us ko

koī de saktī nahīñ

phir bhī us se maiñ bahut mānūs huuñ

saiñkaḌoñ sīnoñ kī dhaḌkan

saiñkaḌoñ āvāz ko

sun rahī huuñ is tarah

jaise ik naġhma koī

yā ho bahte paanī kā ik shor sā

jis ke shor-o-ġhul meñ ab

kho ga.ī jaane kahāñ

mujh ko tanhā.ī mirī achchhī lagī

pyārī lagī

apni tanhai mujhe achchhi lagi

main ne chaha hai use

aur paya bhi use

apne roz-o-shab mein aksar hai basaya bhi use

usi ne di hain mujh ko aisi KHalwaten

jin mein rah kar

main kabhi tanha nahin

sath mere anginat aise ehsasat hain

jin se hasil hai

meri tanhaiyon ko ek sukun

ek rifaqat

gham-gusari

rahnumai

rahbari

pa ke main ehsas ke is qurb ko

rah ke tanha bhi nahin tanha rahi

meri tanhai meri hamdam meri dam-saz hai

us ke KHal-o-KHat se main achchhi tarah waqif nahin

nam bhi maKHsus us ko

koi de sakti nahin

phir bhi us se main bahut manus hun

sainkaDon sinon ki dhaDkan

sainkaDon aawaz ko

sun rahi hun is tarah

jaise ek naghma koi

ya ho bahte pani ka ek shor sa

jis ke shor-o-ghul mein ab

kho gai jaane kahan

mujh ko tanhai meri achchhi lagi

pyari lagi