tanhai

sub.h kā hañstā sitāra tanhā

kaun jaane raat bhar kis karb se guzrā hai

in ghane peḌoñ se lambe tez dāñtoñ vaale ifrīt nikal kar

TeḌhī Tāñgoñ bad-numā pairoñ se komal chāñdnī ke farsh par nāche

khurdure hāthoñ se phūloñ ke jigar chaak kiye

apnī nazroñ kī siyāhī se nikharte hue rañgoñ ke charāġhoñ ko bujhāyā

apne nafrat-bhare sāñsoñ kī bhaḌaktī huī ātish meñ mohabbat kī mahaktī

huī sandal ko bhasm kar Daalā

sub.h kā hañstā sitāra tanhā

kaun jaane din bhar ab kis aag ke dariyā se guzre

āftāb apnī damaktī rath meñ

shab ke ifrītoñ ko masnad par biThā.egā

to sachchā.ī ke phūloñ par bhī moTī dhuul jam jā.egī

āñkheñ pathrā jā.eñgī

rañgoñ kā tamāshā to rahegā

baas uḌ jā.egī

koī zahr kā pyāla na hoñToñ se lagā.egā

sitāra shaam ko apne lahū meñ phir nahā.egā

subh ka hansta sitara tanha

kaun jaane raat bhar kis karb se guzra hai

in ghane peDon se lambe tez danton wale ifrit nikal kar

TeDhi Tangon bad-numa pairon se komal chandni ke farsh par nache

khurdure hathon se phulon ke jigar chaak kiye

apni nazron ki siyahi se nikharte hue rangon ke charaghon ko bujhaya

apne nafrat-bhare sanson ki bhaDakti hui aatish mein mohabbat ki mahakti

hui sandal ko bhasm kar Dala

subh ka hansta sitara tanha

kaun jaane din bhar ab kis aag ke dariya se guzre

aaftab apni damakti rath mein

shab ke ifriton ko masnad par biThaega

to sachchai ke phulon par bhi moTi dhul jam jaegi

aankhen pathra jaengi

rangon ka tamasha to rahega

bas uD jaegi

koi zahr ka pyala na honTon se lagaega

sitara sham ko apne lahu mein phir nahaega