tanhai

kamre meñ sannāTā hai

ḳhāmoshī hai añgnā.ī meñ

badan jale tanhā.ī meñ

dard kī nayyā soch kā sāgar ġham kī tez havā.eñ

yādoñ ke tūfānī bādal zehn pe yuuñ mañDlā.eñ

dhīraj ke patvār mire hāthoñ se chhūTe jaa.eñ

jitnā sañbhālūñ bairī manvā

Duube hai gahrā.ī meñ

badan jale tanhā.ī meñ

palkeñ mūñdūñ niiñd ke badle sāmne tū aa jaa.e

mukh par laaj kā ghūñghaT Daale khaḌī khaḌī muskā.e

pal meñ sāmne aa.e bairan aur pal meñ chhup jaa.e

jaane kyā kyā kah jaatī hai

hañs kar ik añgḌā.ī meñ

badan jale tanhā.ī meñ

yādoñ ke dhuñdle darpan se kab tak dil bahlā.ūñ

kab tak ḳhāmoshī ko āḳhir apne giit sunā.ūñ

kabhī kabhī to tanhā.ī se is darja ghabrā.ūñ

āñgan se kamre meñ aa.uuñ

kamre se añgnā.ī meñ

badan jale tanhā.ī meñ

tanhā.ī kī sej pe āḳhir kaise raat guzārūñ

kaise vaqt ke bikhre gesū tanhā aaj sañvārūñ

bechainī se ghabrā kar jab terā naam pukārūñ

merī hī āvāz palaT kar

lauT aa.e tanhā.ī meñ

badan jale tanhā.ī meñ

dil meñ zaḳhm haiñ niir nayan meñ phir bhī ye muskā.eñ

komal jism jo būḌhe dhanvānoñ kī sej sajā.eñ

bhuuk kī nāgin ke Dar se do roTī meñ bik jaa.eñ

jismoñ ke saude

kitne saste aaj kī is mahñgā.ī meñ

badan jale tanhā.ī meñ

badan jale tanhā.ī meñ

kamre mein sannaTa hai

KHamoshi hai angnai mein

badan jale tanhai mein

dard ki nayya soch ka sagar gham ki tez hawaen

yaadon ke tufani baadal zehn pe yun manDlaen

dhiraj ke patwar mere hathon se chhuTe jaen

jitna sanbhaalun bairi manwa

Dube hai gahrai mein

badan jale tanhai mein

palken mundun nind ke badle samne tu aa jae

mukh par laj ka ghunghaT Dale khaDi khaDi muskae

pal mein samne aae bairan aur pal mein chhup jae

jaane kya kya kah jati hai

hans kar ek angDai mein

badan jale tanhai mein

yaadon ke dhundle darpan se kab tak dil bahlaun

kab tak KHamoshi ko aaKHir apne git sunaun

kabhi kabhi to tanhai se is darja ghabraun

aangan se kamre mein aaun

kamre se angnai mein

badan jale tanhai mein

tanhai ki sej pe aaKHir kaise raat guzarun

kaise waqt ke bikhre gesu tanha aaj sanwarun

bechaini se ghabra kar jab tera nam pukarun

meri hi aawaz palaT kar

lauT aae tanhai mein

badan jale tanhai mein

dil mein zaKHm hain nir nayan mein phir bhi ye muskaen

komal jism jo buDhe dhanwanon ki sej sajaen

bhuk ki nagin ke Dar se do roTi mein bik jaen

jismon ke saude

kitne saste aaj ki is mahngai mein

badan jale tanhai mein

badan jale tanhai mein