tanhai ke baad

jhāñktā hai tirī āñkhoñ se zamānoñ kā ḳhalā

tere hoñToñ pe musallat hai baḌī der kī pyaas

tere siine meñ rahā shor-e-bahārāñ kā ḳharosh

ab to sāñsoñ meñ na garmī hai na āvāz na baas

tū ne ik umr se baazū bhī nahīñ phailā.e

phir bhī bāñhoñ ko hai sadiyoñ kī thakan kā ehsās

tere chehre pe sukūñ khel rahā hai lekin

tere siine meñ to tūfān garajte hoñge

bazm-e-kaunain tirī aañkh meñ vīrān sahī

tire ḳhvāboñ ke mahallāt to samjhe hoñge

garche ab koī nahīñ koī nahīñ aa.egā

phir bhī aahaT pe tire kaan to bajte hoñge

vaqt hai naag tire jism ko Dastā hogā

yaḳh kar tujh ko havā.eñ bhī biphartī hoñgī

sab tire saa.e ko aaseb samajhte hoñge

tujh se ham-joliyāñ katrā ke guzartī hoñgī

kitnī yādeñ tire ashkoñ se ubhartī hoñgī

zindagī har na.e andāz ko apnātī hai

ye fareb apne liye jaal na.e buntā hai

raqs kartī hai tire hoñToñ pe halkī sī hañsī

aur jī ko koī ruuh kī tarah dhuntā hai

laakh pardoñ meñ chhupā shor-e-aziyyat lekin

dil tire dil ke dhaḌakne kī sadā suntā hai

terā ġham jāgtā hai dil ke nihāñ-ḳhānoñ meñ

terī āvāz se siine meñ fuġhāñ paidā hai

terī āñkhoñ kī udāsī mujhe kartī hai udaas

terī tanhā.ī ke ehsās se dil tanhā hai

jāgtī to hai to thak jaatī hai āñkheñ merī

zaḳhm jalte haiñ tire dard mujhe hotā hai

jhankta hai teri aankhon se zamanon ka KHala

tere honTon pe musallat hai baDi der ki pyas

tere sine mein raha shor-e-bahaaran ka KHarosh

ab to sanson mein na garmi hai na aawaz na bas

tu ne ek umr se bazu bhi nahin phailae

phir bhi banhon ko hai sadiyon ki thakan ka ehsas

tere chehre pe sukun khel raha hai lekin

tere sine mein to tufan garajte honge

bazm-e-kaunain teri aankh mein viran sahi

tere KHwabon ke mahallat to samjhe honge

garche ab koi nahin koi nahin aaega

phir bhi aahaT pe tere kan to bajte honge

waqt hai nag tere jism ko Dasta hoga

yaKH kar tujh ko hawaen bhi bipharti hongi

sab tere sae ko aaseb samajhte honge

tujh se ham-joliyan katra ke guzarti hongi

kitni yaaden tere ashkon se ubharti hongi

zindagi har nae andaz ko apnati hai

ye fareb apne liye jal nae bunta hai

raqs karti hai tere honTon pe halki si hansi

aur ji ko koi ruh ki tarah dhunta hai

lakh pardon mein chhupa shor-e-aziyyat lekin

dil tere dil ke dhaDakne ki sada sunta hai

tera gham jagta hai dil ke nihan-KHanon mein

teri aawaz se sine mein fughan paida hai

teri aankhon ki udasi mujhe karti hai udas

teri tanhai ke ehsas se dil tanha hai

jagti to hai to thak jati hai aankhen meri

zaKHm jalte hain tere dard mujhe hota hai