tarana-e-desh-bhagti

ham pe bedād vo karte haiñ to hairat kaisī

ishq hai jis ko vatan se use rāhat kaisī

ḳhuun rag-rag meñ taḌaptā thā nikalne ke liye

teġh-e-qātil ne nikālī mirī hasrat kaisī

jo gadāyān-e-vatan haiñ unheñ ārām kahāñ

aish maqsūm meñ un ke kahāñ ishrat kaisī

jin ke dil dard-e-vatan se sadā nāshād rahe

kyā ḳhabar un ko ki hotī hai masarrat kaisī

ġhair ḳhuuñ chuus rahe the hameñ ma.alūm na thā

sone vāloñ pe thī chhā.ī huī ġhaflat kaisī

har-nafas apnā sharar-bār hai dushman ke liye

mushta.il dil meñ huī ātish-e-ġhairat kaisī

Thaan lī qaid ġhulāmī se nikal jaane kī

dil jo āzād hai sayyād hirāsat kaisī

ḳhidmat-e-mulk kī ḳhātir jo ho nāzil ham par

ye to ārām hai rāhat hai musībat kaisī

jaan dene ko jo tayyār haiñ bhārat ke liye

un ko talvār kā Dar daar kī dahshat kaisī

desh-bhagtī kā jo 'sābir' ne tarāna gaayā

kyā kaheñ ham ko mayassar huī farhat kaisī

hum pe bedad wo karte hain to hairat kaisi

ishq hai jis ko watan se use rahat kaisi

KHun rag-rag mein taDapta tha nikalne ke liye

tegh-e-qatil ne nikali meri hasrat kaisi

jo gadayan-e-watan hain unhen aaram kahan

aish maqsum mein un ke kahan ishrat kaisi

jin ke dil dard-e-watan se sada nashad rahe

kya KHabar un ko ki hoti hai masarrat kaisi

ghair KHun chus rahe the hamein malum na tha

sone walon pe thi chhai hui ghaflat kaisi

har-nafas apna sharar-bar hai dushman ke liye

mushtail dil mein hui aatish-e-ghairat kaisi

Than li qaid ghulami se nikal jaane ki

dil jo aazad hai sayyaad hirasat kaisi

KHidmat-e-mulk ki KHatir jo ho nazil hum par

ye to aaram hai rahat hai musibat kaisi

jaan dene ko jo tayyar hain bhaarat ke liye

un ko talwar ka Dar dar ki dahshat kaisi

desh-bhagti ka jo 'sabir' ne tarana gaya

kya kahen hum ko mayassar hui farhat kaisi