tark-e-talluq

gar ta.alluq hī tark karnā thā

mujh se phir pyaar kyoñ kiyā tū ne

muskurātī lajātī āñkhoñ se

ek iqrār kyoñ kiyā tū ne

maiñ ne kab terā pyaar māñgā thā

maiñ ne kab terī aarzū kī thī

maiñ to ḳhāmosh thā falak kī tarah

maiñ ne kab terī justujū kī thī

tū ne ḳhud muskurātī āñkhoñ se

mujh ko āvāz de ke chauñkāyā

mere nāzuk nā-āshnā dil ko

husn kā saaz de ke chauñkāyā

ab vo qasmeñ vo ahd vo va.ade

jaane kyā ho ga.e ḳhudā jaane

vo junūñ-ḳhez ātishī jazbāt

ab kahāñ kho ga.e ḳhudā jaane

jaane kyoñ ab tirī hasīñ āñkheñ

merī jānib kabhī nahīñ uThtī

jaane kyoñ ab hasīn gāloñ par

phuul kī pañkhuḌiyāñ nahīñ khiltī

gar ta.alluq hī tark karnā thā

kaash pahle hī kah diyā hotā

aaj maiñ apnī zindagānī se

is qadar duur na huā hotā

gar talluq hi tark karna tha

mujh se phir pyar kyon kiya tu ne

muskuraati lajati aankhon se

ek iqrar kyon kiya tu ne

main ne kab tera pyar manga tha

main ne kab teri aarzu ki thi

main to KHamosh tha falak ki tarah

main ne kab teri justuju ki thi

tu ne KHud muskuraati aankhon se

mujh ko aawaz de ke chaunkaya

mere nazuk na-ashna dil ko

husn ka saz de ke chaunkaya

ab wo qasmen wo ahd wo wade

jaane kya ho gae KHuda jaane

wo junun-KHez aatishi jazbaat

ab kahan kho gae KHuda jaane

jaane kyon ab teri hasin aankhen

meri jaanib kabhi nahin uThti

jaane kyon ab hasin galon par

phul ki pankhuDiyan nahin khilti

gar talluq hi tark karna tha

kash pahle hi kah diya hota

aaj main apni zindagani se

is qadar dur na hua hota