tasawwur TuT jata hai

sabhī ko yuuñ to duniyā meñ

hazāroñ log milte hai

magar is bhiiḌ meñ mujh ko

nazar tum hī nahīñ aate

tumheñ maiñ DhūñDtī phirtī huuñ

sahrāoñ meñ gulshan meñ

chaman meñ aur bayābāñ meñ

jahāñ tak raushnī sūraj kī pahūñchī hai

vahāñ tak bhī

jahāñ tak fikr kī parvāz pahuñchī hai

vahāñ tak bhī

tumheñ DhūñDā

nadī ke pāniyoñ kī un ravāñ lahroñ meñ

tum ho kyā

na jaane kyuuñ mujhe aksar yahī ehsās hotā hai

zamīñ se tā-falak nazroñ meñ ik ik pal

tumheñ DhūñDhā

tumheñ DhūñDhā tamannāoñ ke

un gustāḳh lamhoñ meñ

sañjoya hai jinheñ dil ke nihāñ khānoñ meñ

ḳhuud maiñ ne

magar afsos hotā hai

tumheñ paane kī hasrat meñ

maiñ ḳhud ko hī gañvā baiThī

magar tum mil nahīñ paa.e

kabhī to aa ke dhīre se mirī vīrān āñkhoñ meñ

koī ik dil-nashīñ sā ḳhvāb ban kar hī samā jaao

kabhī to haule haule se mirī be-rabt sāñsoñ meñ

na.ī ḳhushbū bano aur ruuh meñ tahlīl ho jaao

kisī din yuuñ achānak se

mujhe aa kar ye samjhāo

ye kaisā haal kar baiThī

ye chehra zard sā kyuuñ hai

ye chehre se ulajhte gesuoñ kī zindagī kaisī

agar be-nūr haiñ āñḳheñ to koī raushnī kaisī

kabhī maiñ khilkhilātī thī kisī ma.asūm bachche sī

hamesha muskurātī thī kabhī ġhuncha-dahan jaisī

jo merī jaan thā kal tak

vo ḳhud ġhāfil huā shāyad

kabhī to kah de vo aa kar

tire bin jī nahīñ saktā

isī ummīd meñ aksar bikhar kar TuuT jaatī huuñ

nahīñ thā jism se matlab

mujhe thī ruuh se nisbat

nazar aatā nahīñ koī

kahīñ par bhī tire jaisā

tasavvur jab ḳhayāloñ meñ

tirī sūrat banātā hai

vo sūrat dekhtī huuñ maiñ

na us meñ rang hai terā

na tere jism kī ḳhushbū

tasavvur to faqat ik aks hai

mub.ham ḳhayāloñ kā

jo aksar TuuT jaatā hai

maiñ bebas dekhtī rahtī huuñ

jhūThe ābgīnoñ ko

jo aksar phuuT jaate haiñ

falak se kahkashāñ ban kar

sitāre TuuT jaate haiñ

sabhi ko yun to duniya mein

hazaron log milte hai

magar is bhiD mein mujh ko

nazar tum hi nahin aate

tumhein main DhunDti phirti hun

sahraon mein gulshan mein

chaman mein aur bayaban mein

jahan tak raushni suraj ki pahunchi hai

wahan tak bhi

jahan tak fikr ki parwaz pahunchi hai

wahan tak bhi

tumhein DhunDa

nadi ke paniyon ki un rawan lahron mein

tum ho kya

na jaane kyun mujhe aksar yahi ehsas hota hai

zamin se ta-falak nazron mein ek ek pal

tumhein DhunDha

tumhein DhunDha tamannaon ke

un gustaKH lamhon mein

sanjoya hai jinhen dil ke nihan khanon mein

KHud main ne

magar afsos hota hai

tumhein pane ki hasrat mein

main KHud ko hi ganwa baiThi

magar tum mil nahin pae

kabhi to aa ke dhire se meri viran aankhon mein

koi ek dil-nashin sa KHwab ban kar hi sama jao

kabhi to haule haule se meri be-rabt sanson mein

nai KHushbu bano aur ruh mein tahlil ho jao

kisi din yun achanak se

mujhe aa kar ye samjhao

ye kaisa haal kar baiThi

ye chehra zard sa kyun hai

ye chehre se ulajhte gesuon ki zindagi kaisi

agar be-nur hain aanKHen to koi raushni kaisi

kabhi main khilkhilati thi kisi masum bachche si

hamesha muskuraati thi kabhi ghuncha-dahan jaisi

jo meri jaan tha kal tak

wo KHud ghafil hua shayad

kabhi to kah de wo aa kar

tere bin ji nahin sakta

isi ummid mein aksar bikhar kar TuT jati hun

nahin tha jism se matlab

mujhe thi ruh se nisbat

nazar aata nahin koi

kahin par bhi tere jaisa

tasawwur jab KHayalon mein

teri surat banata hai

wo surat dekhti hun main

na us mein rang hai tera

na tere jism ki KHushbu

tasawwur to faqat ek aks hai

mubham KHayalon ka

jo aksar TuT jata hai

main bebas dekhti rahti hun

jhuThe aabginon ko

jo aksar phuT jate hain

falak se kahkashan ban kar

sitare TuT jate hain