taswir

huuñ ik arse se koshish meñ

ki merī adh banī tasvīr

apne pāya-e-takmīl tak pahuñche

ka.ī ḳhat khīñch rakkhe haiñ

banānā chāhtī huuñ

kuchh hasīñ chehre

uchhalte kūdte hañste hue

bachchoñ ke bhī ḳhāke

magar jab un ke hoñToñ par

tabassum khīñchnā chāhūñ

to kuchh chehre ubharte haiñ

ki un kī jaltī āñkheñ

jin meñ āmezish dukhoñ kī hai

savāl-e-adl kartī haiñ

vo ik fariyād kartī haiñ

maiñ un ma.asūm chehroñ se

kahūñ bhī kyā

mire hāthoñ kī larzish

salb kar letī hai merā fan

maiñ un ke rū-ba-rū

hone se Dartī huuñ

adhūrī sī mirī tasvīr

puurī ho nahīñ paatī

hun ek arse se koshish mein

ki meri adh bani taswir

apne paya-e-takmil tak pahunche

kai KHat khinch rakkhe hain

banana chahti hun

kuchh hasin chehre

uchhalte kudte hanste hue

bachchon ke bhi KHake

magar jab un ke honTon par

tabassum khinchna chahun

to kuchh chehre ubharte hain

ki un ki jalti aankhen

jin mein aamezish dukhon ki hai

sawal-e-adl karti hain

wo ek fariyaad karti hain

main un masum chehron se

kahun bhi kya

mere hathon ki larzish

salb kar leti hai mera fan

main un ke ru-ba-ru

hone se Darti hun

adhuri si meri taswir

puri ho nahin pati