taswir ka dusra ruKH

ai ki dil terā hai fikr-e-bāda-e-gulfām meñ

zahr bhī hotā hai aksar ḳhūbsūrat jaam meñ

ai ki siine meñ tire armān-e-gul hai be-qarār

dekhnā bedād-e-nok-e-ḳhār se bhī hoshiyār

is sukūt-e-ārzī par ḳhush na ho jaanā kahīñ

tū ne madd-o-jazr maujoñ kā abhī dekhā nahīñ

kar na de ḳhīra tirī nazroñ ko taz.īn-e-ġhilāf

haañ isī parde meñ hai ik teġha-e-ḳhāra-shigāf

bā.is-e-dil-bastagī alfāz kā jaadū na ho

dekh lafzoñ meñ nihāñ dam kā koī pahlū na ho

hai tirī tishna-labī ko ārzū-e-jū-e-āb

justujū terī na ho vārafta-e-dasht-e-sarāb

hai nazar-afroz agarche jalva-e-barq-e-tapāñ

ḳhirman-e-dahqāñ se lekin pūchh us kī dāstāñ

aag se bach kaam meñ lā quvvat-e-tam.īz ko

kah nahīñ sakte haiñ sonā har chamaktī chiiz ko

sho.ala-e-be-bāk bhī hai matla-e-anvār bhī

sham.a kī fitrat meñ ġhāfil nuur bhī hai naar bhī

ḳhūbī-e-āġhāz hī par dil na ho jaa.e nihāñ

talḳhi-e-anjām kā bhī dil meñ kar letā ḳhayāl

pī na jaanā bāda-e-ishrat kā jām-e-ḳhush-gavār

hai bahut taklīf-dah a.azā-shikan is kā ḳhumār

zāhirī hālat pe hargiz kar na bātin kā qayās

ḳhūbī-e-tan par dalālat kar nahīñ saktā libās

hai dil-e-sāda tirā vārafta-e-husn-e-hijāb

zisht-rūī kā kahīñ parda na ho rangīñ naqāb

ho na jaa.e mo'taqid dil zāhirī tanvīr kā

dekh lenā dūsrā ruḳh bhī zarā tasvīr kā

ai ki dil tera hai fikr-e-baada-e-gulfam mein

zahr bhi hota hai aksar KHubsurat jam mein

ai ki sine mein tere arman-e-gul hai be-qarar

dekhna bedad-e-nok-e-KHar se bhi hoshiyar

is sukut-e-arzi par KHush na ho jaana kahin

tu ne madd-o-jazr maujon ka abhi dekha nahin

kar na de KHira teri nazron ko tazin-e-ghilaf

han isi parde mein hai ek tegha-e-KHara-shigaf

bais-e-dil-bastagi alfaz ka jadu na ho

dekh lafzon mein nihan dam ka koi pahlu na ho

hai teri tishna-labi ko aarzu-e-ju-e-ab

justuju teri na ho warafta-e-dasht-e-sarab

hai nazar-afroz agarche jalwa-e-barq-e-tapan

KHirman-e-dahqan se lekin puchh us ki dastan

aag se bach kaam mein la quwwat-e-tamiz ko

kah nahin sakte hain sona har chamakti chiz ko

shoala-e-be-bak bhi hai matla-e-anwar bhi

shama ki fitrat mein ghafil nur bhi hai nar bhi

KHubi-e-aghaz hi par dil na ho jae nihan

talKHi-e-anjam ka bhi dil mein kar leta KHayal

pi na jaana baada-e-ishrat ka jam-e-KHush-gawar

hai bahut taklif-dah aaza-shikan is ka KHumar

zahiri haalat pe hargiz kar na baatin ka qayas

KHubi-e-tan par dalalat kar nahin sakta libas

hai dil-e-sada tera warafta-e-husn-e-hijab

zisht-rui ka kahin parda na ho rangin naqab

ho na jae mo'taqid dil zahiri tanwir ka

dekh lena dusra ruKH bhi zara taswir ka