tauq-e-nakaami

ishq meñ Thahre haiñ ham nā-kāmyāb

Daal kar gardan meñ nākāmī kā tauq

tū bahut ġhamgīn hai

tū matā-e-zīst ko samjhā hai ashkoñ kī bahār

kis qadar mushkil hai manzil

dostī ke rāstoñ kī

kis qadar āfāt haiñ

ik taraf bechārgī hai nafs kī

ik taraf mub.ham se jazboñ kī pukār

ik taraf terī mohabbat kā hisār

kaash tū itnā to samjhe

is jahān-e-zīst kī manzil hai tū

tujh se haiñ ye rāt-din ke silsile

kaash tū itnā to jaane

tujh se maiñ paivast huuñ rūh-e-azal se

jism aur ruuh kī tanābeñ ḳhema-zan haiñ

tere sāhil ke suhāne dosh par

aur tū ḳhāmosh sāgar kī tarah hai be-kanār

ham hue nākām yā haiñ kāmyāb

faisla chhoḌeñ usī par

ham hue jis par nisār

kaash tū itnā to maane

ishq mein Thahre hain hum na-kaamyab

Dal kar gardan mein nakaami ka tauq

tu bahut ghamgin hai

tu mata-e-zist ko samjha hai ashkon ki bahaar

kis qadar mushkil hai manzil

dosti ke raston ki

kis qadar aafat hain

ek taraf bechaargi hai nafs ki

ek taraf mubham se jazbon ki pukar

ek taraf teri mohabbat ka hisar

kash tu itna to samjhe

is jahan-e-zist ki manzil hai tu

tujh se hain ye raat-din ke silsile

kash tu itna to jaane

tujh se main paiwast hun ruh-e-azal se

jism aur ruh ki tanaben KHema-zan hain

tere sahil ke suhane dosh par

aur tu KHamosh sagar ki tarah hai be-kanar

hum hue nakaam ya hain kaamyab

faisla chhoDen usi par

hum hue jis par nisar

kash tu itna to mane