TeDha sawal

mez ke uupar rakkhe the kāñse ke bandar

kamre meñ thā ek dhuñdalkā halkā halkā

maiñ ne dekhā

ik bandar thā haath rakhe apnī āñkhoñ par

ik hoñToñ par

ik kānoñ par

ek hañsī hoñToñ par aa.ī

guuñj abhī baaqī thī us kī

maiñ ne āñkheñ mal kar dekhā

āñkhoñ par se haath haTā.e bandar mujh ko ghuur rahā hai

yuuñ goyā hai

kaisī achchhī nasl thī jis ne mere haath rakhe merī āñkhoñ par

kaisī achchhī nasl thī jis ne chāhā maiñ na burā.ī koī dekhūñ

nāqis manzar ban na sake kāñTā āñkhoñ kā

nek banūñ maiñ

maiñ ne dekhā

dūsrā bandar hoñToñ par se haath haTā.e merī jānib dekh rahā hai

yuuñ goyā hai

kaisī achchhī nasl thī jis ne mere haath rakhe mere hoñToñ par

kaisī achchhī nasl thī jis ne chāhā koī lafz burā na kahūñ maiñ

nek banūñ maiñ nek rahūñ maiñ

maiñ ne dekhā

tīnoñ bandar yuuñ goyā haiñ

ek zamāne baa'd ab ham ne

āñkheñ kholīñ jannat badlī badlī sī duniyā kī dekhī

lab khole haiñ lafzoñ kī lazzat se lab mahzūz hue haiñ

lafz sune shīrīñ lafzoñ kā sehr ajab hai

lekin

ab ham ko pahchān nahīñ hai

kyā achchhā hai aur burā kyā

tum batlāo

saarī burā.ī ḳhatm huī kyā

kyā duniyā ghar hai nekī kā

mez ke upar rakkhe the kanse ke bandar

kamre mein tha ek dhundalka halka halka

main ne dekha

ek bandar tha hath rakhe apni aankhon par

ek honTon par

ek kanon par

ek hansi honTon par aai

gunj abhi baqi thi us ki

main ne aankhen mal kar dekha

aankhon par se hath haTae bandar mujh ko ghur raha hai

yun goya hai

kaisi achchhi nasl thi jis ne mere hath rakhe meri aankhon par

kaisi achchhi nasl thi jis ne chaha main na burai koi dekhun

naqis manzar ban na sake kanTa aankhon ka

nek banun main

main ne dekha

dusra bandar honTon par se hath haTae meri jaanib dekh raha hai

yun goya hai

kaisi achchhi nasl thi jis ne mere hath rakhe mere honTon par

kaisi achchhi nasl thi jis ne chaha koi lafz bura na kahun main

nek banun main nek rahun main

main ne dekha

tinon bandar yun goya hain

ek zamane ba'd ab hum ne

aankhen kholin jannat badli badli si duniya ki dekhi

lab khole hain lafzon ki lazzat se lab mahzuz hue hain

lafz sune shirin lafzon ka sehr ajab hai

lekin

ab hum ko pahchan nahin hai

kya achchha hai aur bura kya

tum batlao

sari burai KHatm hui kya

kya duniya ghar hai neki ka