tere nainon ki KHair

maiñ jab palkoñ ke darvāzoñ pe utrūñ to raushniyoñ se jholī bhar luuñ

ye saare anokhe dukh bhare din

mere hāfize kī taḳhtī se miT miT jā.eñge

ik pāgal umang bharā din hogā

jab tū añdheroñ kī bastī se nuur ke raste par chaltā huā

shahr meñ apnī aamad kā elaan karegā

tab saare parinde apne ghoñsloñ se bāhar aa kar tumheñ salāmī

deñge

apnī ḳhushī bharī chahkāroñ se

shahr ke saare achchhe log tumheñ ziyāfateñ deñge

tum zarūr jaanā un ke diloñ ko TaTolne ke liye

ki is se achchhā mauqa un ko parakhne kā aur nahīñ milegā

saare bādal jhuk kar tumheñ dekheñge

tum zarūr bhīgnā un kī phuvāroñ meñ ki tumheñ bārish meñ bhīgnā achchhā

lagtā hai

bastī kī saarī laḌkiyāñ tumhārī aamad par raqs kareñgī

tum un ke paañv kī raftār zarūr dekhnā

magar un meñ ek laḌkī dīvāna-vār naach rahī hogī

tum us ko aane denā

apne qadmoñ ke uupar

ki vo apnī ḳhushiyoñ kā qarz

tumhāre qadmoñ meñ miTTī kā Dher ho kar utāregī

tum us ko kabhī na uThānā

tumhāre aane ke ba.ad hī to vo apnī niiñd puurī karegī

ki jab tum nahīñ the

to nain jagte the us ke tumhāre saare rastoñ par

ab tum sūraj ban kar chamaknā aur miTTī ke is Dher ko kundan kar denā

apne hāthoñ kī jumbish se

main jab palkon ke darwazon pe utrun to raushniyon se jholi bhar lun

ye sare anokhe dukh bhare din

mere hafize ki taKHti se miT miT jaenge

ek pagal umang bhara din hoga

jab tu andheron ki basti se nur ke raste par chalta hua

shahr mein apni aamad ka elan karega

tab sare parinde apne ghonslon se bahar aa kar tumhein salami

denge

apni KHushi bhari chahkaron se

shahr ke sare achchhe log tumhein ziyafaten denge

tum zarur jaana un ke dilon ko TaTolne ke liye

ki is se achchha mauqa un ko parakhne ka aur nahin milega

sare baadal jhuk kar tumhein dekhenge

tum zarur bhigna un ki phuwaron mein ki tumhein barish mein bhigna achchha

lagta hai

basti ki sari laDkiyan tumhaari aamad par raqs karengi

tum un ke panw ki raftar zarur dekhna

magar un mein ek laDki diwana-war nach rahi hogi

tum us ko aane dena

apne qadmon ke upar

ki wo apni KHushiyon ka qarz

tumhaare qadmon mein miTTi ka Dher ho kar utaregi

tum us ko kabhi na uThana

tumhaare aane ke baad hi to wo apni nind puri karegi

ki jab tum nahin the

to nain jagte the us ke tumhaare sare raston par

ab tum suraj ban kar chamakna aur miTTi ke is Dher ko kundan kar dena

apne hathon ki jumbish se