thakan

'ajīb kaifiyat se do-chār huuñ

is samay merī āḳhirī ḳhvāhish pūchhī jaatī to maiñ aisā shaḳhs māñgtā jo merī thakan baañT le

tumhāre hijr meñ jangal ghūmnā chāhtā huuñ

hijr ek ḳhizāñ hai yā kuchh aur hai

havā-e-hijr ne tamām peḌ jalā diye haiñ har-sū vīrānī hai

merā ḳhud par se e'timād uTh gayā hai

dālān se andar kī jānib girte paḌte vast meñ aa kar ek bheḌiye kā ruup dhaar kar nochne lagte haiñ

mere misroñ ke aksar-o-beshtar rukn tumhārī ‘adam-maujūdgī par ehtijājan gir rahe haiñ

nīlam kā nīlgūñ paanī kahīñ rah gayā hai

jehlam apne andar ḳhizā.eñ ghol rahā hai

maiñ shāyad ek ‘umr-rasīda shaḳhs huuñ

ek sunsān jazīre meñ kisī mo'jize kā muntazir khaḌā huuñ

is se pahle ki tumhāre palaTne ke ḳhauf meñ mubtalā ho jā.ūñ

tumheñ chāhiye ki mere liye lā-mutanāhī hijr kī du'ā māñgo

'ajib kaifiyat se do-chaar hun

is samay meri aaKHiri KHwahish puchhi jati to main aisa shaKHs mangta jo meri thakan banT le

tumhaare hijr mein jangal ghumna chahta hun

hijr ek KHizan hai ya kuchh aur hai

hawa-e-hijr ne tamam peD jala diye hain har-su virani hai

mera KHud par se e'timad uTh gaya hai

dalan se andar ki jaanib girte paDte wast mein aa kar ek bheDiye ka rup dhaar kar nochne lagte hain

mere misron ke aksar-o-beshtar rukn tumhaari ‘adam-maujudgi par ehtijajan gir rahe hain

nilam ka nilgun pani kahin rah gaya hai

jehlam apne andar KHizaen ghol raha hai

main shayad ek ‘umr-rasida shaKHs hun

ek sunsan jazire mein kisi mo'jize ka muntazir khaDa hun

is se pahle ki tumhaare palaTne ke KHauf mein mubtala ho jaun

tumhein chahiye ki mere liye la-mutanahi hijr ki du'a mango