thakan

kaT ga.e apnī javānī ke mah-o-sāl yūñhī

roz-o-shab kūcha-o-bāzār meñ mañDlāte hue

kabhī hañs kar kabhī ro kar kabhī ḳhāmoshī se

dil-e-betāb ko har gaam pe bahlāte hue

husn se ham ko aqīdat thī so har hālat meñ

giit gaate hī rahe mahfil-e-ḳhūbāñ ke liye

shāh-rāhoñ pe bayābānoñ meñ sahrāoñ meñ

phuul ham chunte rahe un ke shabistāñ ke liye

raat bhar ashk bahāte the magar sub.h ko ham

aa.ine laate rahe zulf-e-pareshāñ ke liye

phir bhī logoñ ne vafādār na samjhā ham ko

bazm-e-ḳhūbāñ meñ koī ham se muḳhātib na huā

duur hī duur rahe saare hasīñ nazzāre

ajnabī hī kī tarah ham ko har ik ne dekhā

kabhī mai-ḳhāne meñ baiThe to ye sochā ham ne

husn ke qāfila-e-ḳhvāb kī manzil hai sharāb

nasha ab aatā hai ab uThtā hai chehre se naqāb

saiñkaḌoñ baar yūñhī rāsta dekhā ham ne

nasha aayā na koī raaz kisī ne kholā

ham to uTh aa.e vahāñ se bhī bahar-hāl yūñhī

kaT ga.e apnī javānī ke mah-o-sāl yūñhī

kaT gae apni jawani ke mah-o-sal yunhi

roz-o-shab kucha-o-bazar mein manDlate hue

kabhi hans kar kabhi ro kar kabhi KHamoshi se

dil-e-betab ko har gam pe bahlate hue

husn se hum ko aqidat thi so har haalat mein

git gate hi rahe mahfil-e-KHuban ke liye

shah-rahon pe bayabanon mein sahraon mein

phul hum chunte rahe un ke shabistan ke liye

raat bhar ashk bahate the magar subh ko hum

aaine late rahe zulf-e-pareshan ke liye

phir bhi logon ne wafadar na samjha hum ko

bazm-e-KHuban mein koi hum se muKHatib na hua

dur hi dur rahe sare hasin nazzare

ajnabi hi ki tarah hum ko har ek ne dekha

kabhi mai-KHane mein baiThe to ye socha hum ne

husn ke qafila-e-KHwab ki manzil hai sharab

nasha ab aata hai ab uThta hai chehre se naqab

sainkaDon bar yunhi rasta dekha hum ne

nasha aaya na koi raaz kisi ne khola

hum to uTh aae wahan se bhi bahar-haal yunhi

kaT gae apni jawani ke mah-o-sal yunhi