Tipu-sultan

nazar se aaj jo guzrī haiñ chand tasvīreñ

vo dil pe naqsh haiñ jaise lahū kī tahrīreñ

basī hai jañg-e-sirañgā-paTām āñkhoñ meñ

kisī shahīd pe saaya kiye haiñ shamshīreñ

ġhulām qaum tujhe kuchh hayā bhī aatī hai

haiñ tere chāñd ye ḳhāk-afganī kī tadbīreñ

tirā charāġh sar-e-shām bujh gayā lekin

sahar ke bhes meñ phaileñgī us kī tanvīreñ

mire shahīd tire nā-e-pāk se qaumeñ

kareñgī āya-e-hubb-e-vatan kī tafsīreñ

payām-e-sa.ī-e-sar-afrāzī-e-vatan hai tū

shahīd-o-ġhāzī-o-jarrār-o-saf-shikan hai tū

siyāsat-e-vatanī kī fazā thī zahr-ālūd

havā-e-ġharb thī nā-sāzgār-o-nā-mas.ūd

sabāh-e-daulat-e-taimūriya kī aa.ī thī shaam

paḌā thā nayyar-e-iqbāl-e-hind sar-ba-sujūd

guloñ ko loriyāñ detā thā e'tibār-e-bahār

chaman meñ sabza-e-begāna pā rahā thā numūd

hai tere ba.ad tirī yaad iftiḳhār-e-vatan

tirā mazār hai sham-e-sar-e-mazār-e-vatan

pukārtī haiñ sirañgā-paTam kī dīvāreñ

ki ham ko yaad haiñ vo goliyoñ kī bauchhāreñ

dahan kushāda haiñ choToñ ke ghaav kyā ma.alūm

ye kab hamīyat-e-hubb-e-vatan ko lālkāreñ

shahīd-e-zinda-e-jāved haiñ vahī sāvañt

jo nām-e-pāk-e-vatan par laḌeñ mareñ māreñ

is ek jān-e-girāmī pe laakh jaañ sadqe

is ek maut pe sau umr-e-jāvedāñ sadqe

nazar se aaj jo guzri hain chand taswiren

wo dil pe naqsh hain jaise lahu ki tahriren

basi hai jang-e-siranga-paTam aankhon mein

kisi shahid pe saya kiye hain shamshiren

ghulam qaum tujhe kuchh haya bhi aati hai

hain tere chand ye KHak-afgani ki tadbiren

tera charagh sar-e-sham bujh gaya lekin

sahar ke bhes mein phailengi us ki tanwiren

mere shahid tere na-e-pak se qaumen

karengi aaya-e-hubb-e-watan ki tafsiren

payam-e-sai-e-sar-afraazi-e-watan hai tu

shahid-o-ghazi-o-jarrar-o-saf-shikan hai tu

siyasat-e-watani ki faza thi zahr-alud

hawa-e-gharb thi na-sazgar-o-na-masud

sabah-e-daulat-e-taimuriya ki aai thi sham

paDa tha nayyar-e-iqbaal-e-hind sar-ba-sujud

gulon ko loriyan deta tha e'tibar-e-bahaar

chaman mein sabza-e-begana pa raha tha numud

hai tere baad teri yaad iftiKHar-e-watan

tera mazar hai sham-e-sar-e-mazar-e-watan

pukarti hain siranga-paTam ki diwaren

ki hum ko yaad hain wo goliyon ki bauchhaaren

dahan kushada hain choTon ke ghaw kya malum

ye kab hamiyat-e-hubb-e-watan ko lalkaren

shahid-e-zinda-e-jawed hain wahi sawant

jo nam-e-pak-e-watan par laDen maren maren

is ek jaan-e-girami pe lakh jaan sadqe

is ek maut pe sau umr-e-jawedan sadqe